சத்தியமே லட்சியமாய்க் கொள்ளடா

தெய்வம் மானுஷ ரூபேண: அதாவது தெய்வம் மனித வடிவில் விளங்குவது. தெய்வம் எனும் பகுத்தறிவுக்கு எட்டாத எல்லையில்லாத சக்தியை அனைவரும் வ்ழிபடுவது துன்பங்களிலிருந்து விடுபடவும் அத்தகைய துன்பங்களைத் தாங்கும் மனோவலிமையைப் பெறவுமேயாகும். மனிதனாகப் பிறந்த நாம் ஒவ்வொருவரும் நம்மை நம்பியவர்களைக் குறைவின்றிக் காத்து அனைவரிடமும் கருணையுடனும் அன்புடனும் பழகினால் நம்மை எல்லோரும் என்றும் தெய்வமாகப் போற்றி வணங்குவதுறுதி.

ஒரு குடும்பத் தலைவன் தன் மனைவி, மக்கள் மற்றும் தன்னை நம்பி வாழும் வயது முதிர்ந்த பெற்றோர், உற்றார் உறவினர் அனைவரது தேவைகளுக்கேற்ற பொருளை உழைத்து ஈட்டி அவர்களுக்குத் தன் வாழ்நாள் உள்ளவரை தக்க உதவிகளைச் செய்து வாழ்தல் எவ்வாறு இன்றியமையாத கடமையாகக் கருதப்படுகிறதோ அதே போல ஒரு நாட்டின் மக்கள் அனைவரையும் அவர்களது இன்றியமையாத தேவைகளைப் பூர்த்தி செய்து காப்பது நாட்டை ஆளும் அரசாங்கத்தின் கடமை.

இத்தகைய கடமைகளை முறையாகவும் உண்மையாகவும் செய்ய ஒருவர் முதற்கண் உண்மை ஒன்றையே பேசி நேர்மையாகவும் நாணயமாகவும் நடந்து கொள்வது மிவகும் அவசியம். அவ்வாறு உண்மையையே வாழ்வில் அனைத்திலும் பெரிதெனக் கொண்டு வாழ்ந்து காட்டிய நம் தேசப்பிதா மஹாத்மா காந்தியை இன்று அமெரிக்காவின் ஜானாதிபதி முதல் உலகிலுள்ளோர் அனைவரும் போற்றி வணங்குவதைக் காண்கிறோம். நாம் வாழ்வில் பெரும்பொருள் ஈட்டி பெரிய செல்வந்தனாக விளங்குவதில் ஏற்படும் பெருமையை விடவும் வாழ்நாள் முழுதும் வறுமையில் வாடினாலும் பொய் சொல்லாது உண்மையே பேசி உத்தமனாக வாழ்வதால் ஏற்படும் பெருமை மிகவும் பெரியது.

உண்மையின் பாதையில் தொட்ர்ந்து செல்பவன் ஒரு நாளும் தோல்வியடைவதில்லை, ஏனெனில் உண்மை ஒருவனிடம் இருக்குமேயானால் அவனுக்கு இவ்வுலகமே துணையாக நிற்கும். சந்தர்ப்பவசத்தால் அவனை விரோதிகள் யாரும் சதி செய்ய முயன்றால் அத்தகைய சதியிலிருந்து அவனை அவனது உண்மையே மீட்க வல்லதாகும். எத்துணை பணமிருந்தாலும் எவ்வளவு அறிவிருந்தாலும் எத்துணை பேர் புகழ வாழ்ந்தாலும் ஒருவரிடம் உண்மையில்லாவிடில் அவர் இருக்கையிலும் இறக்கையிலும் அதன் பின்னரும் என்றென்றும் இகழப்படுவர் என்பது உள்ளங்கை நெல்லிக்கனியென விளங்கும் உண்மையாகும்.

"உண்மையைச் சொல்லி நன்மையைச் செய்தால் உலகம் உன்னிடம் மயங்கும்" எனும் கவிஞனின் வாக்கு என்றும் பொய்ப்பதில்லை.

சத்தியமே லட்சியமாய்க் கொள்ளடா

திரைப்படம்: நீலமலைத் திருடன்
இயற்றியவர்: ஏ. மருதகாசி
இசை: கே.வி. மஹாதேவன்
பாடியவர்: டி.எம். சௌந்தரராஜன்

சத்தியமே லட்சியமாய்க் கொள்ளடா
தலை நிமிர்ந்து உனை உணர்ந்து செல்லடா

சத்தியமே லட்சியமாய்க் கொள்ளடா
சத்தியமே லட்சியமாய்க் கொள்ளடா
தலை நிமிர்ந்து உனை உணர்ந்து செல்லடா ஆ ஆஆஆ
சத்தியமே லட்சியமாய்க் கொள்ளடா
தலை நிமிர்ந்து உனை உணர்ந்து செல்லடா ஆ ஆஆஆ
சத்தியமே லட்சியமாய்க் கொள்ளடா செல்லடா

எத்தனையோ மேடு பள்ளம் வழியிலே - உன்னை
இடர வைத்து தள்ளப் பார்க்கும் குழியிலே
எத்தனையோ மேடு பள்ளம் வழியிலே - உன்னை
இடர வைத்து தள்ளப் பார்க்கும் குழியிலே
அத்தனையும் தாண்டி காலை முன்வையடா
அத்தனையும் தாண்டி காலை முன்வையடா - நீ
அஞ்சாமல் கடமையிலே கண்வையடா ஆஆஆ

சத்தியமே லட்சியமாய்க் கொள்ளடா செல்லடா

குள்ள்நரிக் கூட்டம் வந்து குறுக்கிடும்
நல்லவர்க்குத் தொல்லை தந்து மடக்கிடும் - நீ
எள்ளளவும் பயங்கொண்டு மயங்காதேடா
எள்ளளவும் பயங்கொண்டு மயங்காதேடா - அவற்றை
எமனுலகு அனுப்பி வைக்கத் தயங்காதேடா

சத்தியமே லட்சியமாய்க் கொள்ளடா
தலை நிமிர்ந்து உனை உணர்ந்து செல்லடா ஆ ஆஆஆ
சத்தியமே லட்சியமாய்க் கொள்ளடா செல்லடா
செல்லடா

ஜாவ்ரே ஜா இந்த கேட்டுக்கு நீ ராஜா

செல்வந்தர்களின் வீடுகளின் நுழைவாயிலில் பொதுவாக வாயில் காப்பவர் ஒருவரோ ஒருவருக்கு மேற்பட்டவரோ இருப்பர். இவர்களது கடமை அவர்கள் காவலுக்கு நியமிக்கப் பட்ட வீடுகளிலிருந்து எவரும் எப்பொருளையும் களவாடிச் செல்லாமலும் சமூக விரோதிகள் யாரும் வீட்டுக்குள் நுழைந்து விடாமலும் காப்பதாகும். இத்தகைய காவல் பணியைச் செய்வதற்காகவே இவர்களுக்குரிய ஊதியம் வழங்கப்படுகிறது.

இதே ரீதியில் நாட்டையும் நாட்டின் ஒவ்வொரு மாநிலத்தையும் ஆளும் அரசாங்கத்தைச் சேர்ந்த அமைச்சர்களும், அதிகாரிகளும் நாட்டையும், மாநிலத்தையும் இத்தகைய களவாணிகளிடமிருந்து காப்பதும் சமூக விரோதிகளின் செயல்பாட்டைத் தடுப்பதும் முக்கியக் கடமையாகக் கொண்டு செயல்படுவதற்காகவே அவர்களுக்கு அவர்கள் வகிக்கும் பதவிகள் தரப்பட்டு அவற்றுக்குரிய ஊதியமும் வழங்கப் படுகிறது.

பல சமயங்களில் வீட்டைக் காவல் காக்கும் காவலாளியே வேறு கள்வர்களுடன் கூட்டுச் சேர்ந்து கொண்டு தாம் காவல் காக்கும் வீட்டையே கொள்ளையடிப்பது, அவ்வீட்டிலுள்ளோரது குழந்தைகளைக் கடத்திச் சென்று பணம் கேட்டு மிரட்டுவது போன்ற குற்றங்களில் ஈடுபட்டுள்ளது அவ்வப்போது செய்தித்தாள்களில் வெளியிடப்படும் செய்திகளிலிருந்து தெரியவருகிறது.

இன்று நமது நாட்டை ஆள்வோரே நாட்டின் செல்வங்களைக் கொள்ளையிட்டு, மக்களைப் பட்டினி போட்டுத் தாம் மட்டும் கோடிக்கணக்கில் சொத்து சேர்த்து சுகவாழ்வு வாழ்ந்துவரும் இழிநிலை பரவலாக உருவாகியுள்ளது. இதன் காரணம் நாட்டு மக்கள் நாட்டை ஆள்வோரைத் தேர்ந்தெடுப்பதில் போதிய அக்கரை காட்டாது கண்மூடித்தனமாக இருப்பதுவே ஆகும்.

இத்தகைய இழிநிலையைத் தவிர்க்க முதற்கண் மக்கள் யாவரும் நாட்டின் முக்கிய நிகழ்ச்சிகளைப் பற்றி அறிந்து கொள்வது அவசியம். தினசரி கடமைகளுள் ஒன்றாக செய்தித்தாள்களிலும் தொலைக்காட்சி செய்திகளிலும் இடம் பெறும் செய்திகளை அறிந்து கொள்வதை அமைத்துக் கொள்ள வேண்டும். அப்பொழுதுதான் நம் நாட்டை ஆள்வோரின் உண்மையான நிலை தெரியவரும்.நல்லவர் போல் தெரிபவரெல்லாம் நல்லவரல்ல என்பதுவும் புரியும். நாட்டை ஆளும் அமைச்சர்கள் தம் வரையிலும் நல்லவராக இருப்பது மட்டும் போதாது. தம்முடனும் தமது அதிகாரத்தின் கீழும் பணிபுரியும் அனைத்து அமைச்சர்கள் மற்றும் அதிகாரிகள் யாரும் தவறுகள் ஏதும் செய்யாமல் பார்த்துக்கொண்டு முறைகேடுகளைத் தவிர்ப்பது ஒவ்வொரு அமைச்சரின் முக்கியக் கடமையாகும்.

இக்கடமையைச் செய்யத் திறமில்லாத, மனமில்லாத ஒருவர் அமைச்சராக இருப்பதும் திருடனாக இருப்பதும் ஒன்றே. காவல் காப்பவன் தான் திருடாதிருப்பதை விட, வேறு யாரும் திருடாது பார்த்துக் கொள்வதே காவல் பணியில் அவன் ஈடுபடுத்தப்படுவதன் நோக்கம். இந்நோக்கம் நிறைவேறாவிடில் காவலாளி எதற்கு? அவனுக்கு சம்பளம் எதற்கு? தன் கடமையைச் செய்யாதவனுக்கு வெட்டி அதிகாரம் எதற்கு? ஆர்ப்பாட்டம் எதற்கு?

ஜாவ்ரே ஜா இந்த கேட்டுக்கு நீ ராஜா

திரைப்படம்: குமரிப்பெண்
இயற்றியவர்: கவிஞர் கண்ணதாசன்
இசை: எம்.எஸ். விஸ்வநாதன்
பாடியவர்: பி.பி. ஸ்ரீநிவாஸ்

ஜாவ்ரே ஜா இந்த கேட்டுக்கு நீ ராஜா
ஜாவ்ரே ஜா அந்த வீட்டுக்கு நான் ராஜா
ஜாவ்ரே ஜா இந்த கேட்டுக்கு நீ ராஜா
ஜாவ்ரே ஜா அந்த வீட்டுக்கு நான் ராஜா

தினம் தினம் இரவினில் தூங்கிவிட்டு
திருடரைத் திருடிக்கொண்டோட விட்டு
தினம் தினம் இரவினில் தூங்கிவிட்டு
திருடரைத் திருடிக்கொண்டோட விட்டு
அகப்பட்ட மனுஷனைப் பிடிக்கிற வேலைக்கு
ஆர்ப்பாட்டம் என்ன ராஜா?

ஜாவ்ரே ஜா இந்த கேட்டுக்கு நீ ராஜா
ஜாவ்ரே ஜா அந்த வீட்டுக்கு நான் ராஜா

ஆஹாஹஹா ஓஹோஹோஹோ
லாலாலாலா பம்பம்பம்பம்

காக்கைக்கும் குருவிக்கும் கடல் சொந்தமோ?
கழுதைக்கு சுமக்கிற பொதி சொந்தமோ
நாக்குக்கு ஆயிரம் மொழி சொந்தமோ?
நாலு காலுக்கொரு வால் சொந்தமோ

ஜாவ்ரே ஜா இந்த கேட்டுக்கு நீ ராஜா
ஜாவ்ரே ஜா அந்த வீட்டுக்கு நான் ராஜா

வருகிற உறவுக்கு மனை சொந்தமோ?
மயக்குற முகத்துக்கு எழில் சொந்தமோ?
கொடுக்கிற பணத்துக்கு இடம் சொந்தமோ?
கூடும் கூட்டத்துக்கு மடம் சொந்தமோ?

ஜாவ்ரே ஜா இந்த கேட்டுக்கு நீ ராஜா
ஜாவ்ரே ஜா அந்த வீட்டுக்கு நான் ராஜா

தினம் தினம் இரவினில் தூங்கிவிட்டு
திருடரைத் திருடிக்கொண்டோட விட்டு
அகப்பட்ட மனுஷனைப் பிடிக்கிற வேலைக்கு
ஆர்ப்பாட்டம் என்ன ராஜா?

ஜாவ்ரே ஜா இந்த கேட்டுக்கு நீ ராஜா
ஜாவ்ரே ஜா அந்த வீட்டுக்கு நான் ராஜா

குற்றம் புரிந்தவன்

நமது நாட்டில் மட்டுமன்றி உலகெங்கிலுமுள்ள பல நாடுகளிலும் தொன்று தொட்டு ஆண்களின் ஆதிக்கத்திலேயே சமுதாயம் நடந்து வந்துள்ளது சரித்திரத்தின் வாயிலாகத் தெரிகிறது. இதற்கு முக்கியக் காரணம் பெண்கள் தமது குடும்பத்திலுள்ளோரைப் பேணி, அவர்களுக்குத் தேவையான சமையல், துப்புறவு மற்றும் பிற பணிகளைச் செய்ய, ஆண்கள் மட்டுமே வெளியுலகில் சென்று பொருளீட்டுவதும் சமுதாயப் பணிகளைச் செய்வதும் இயல்பாக நடைபெற்று வந்துளதேயாகும். இத்தகைய மனித நேயம் குறைந்து பெண்களுக்கெதிரான அடக்கு முறைகள் மலிந்து விளங்கிய காலத்தில் மனிதகுலத்தில் பெண்ணுரிமையை வலியுறுத்தியவர்களுள் மஹாகவி பாரதியார் மிகவும் குறிப்பிடத்தக்கவர்.

அதுவரை கதைகளிலும் காவியங்களிலும் வரும் சில பெண்கள் தம் கணவனையன்றி வேறு எவரையும் மனதில் கணமும் நினையாது கணவனே கண்க்ண்ட தெய்வம் எனப் போற்றி வாழ்ந்த கற்புக்கரசிகளாகவும் அப்பெண்களின் கணவன்மார்கள் தம் மனைவியரைத் துச்சமாக எண்ணி வேறு பெண்களையும் விலைமாதர்களையும் தேடிச் சென்று தமது சுகமொன்றே பெரிதெனக் கொண்டு வாழ்ந்த சுயநலவாதிகளாகவும் சித்தரிக்கப் பட்டு வந்தது நாம் அனைவரும் அறிந்த உண்மையே. அது மட்டுமன்றி ஒரு பெண்ணை ஒருவருக்கு மணம் முடிக்கையில் அந்தப் பெண்ணின் சம்மதத்தைக் கேட்டறியாமலே சந்தையில் மாடுகளை விற்பதைப் போன்ற முறையில் யாருக்கு வேண்டுமானாலும் திருமணம் செய்து கொடுக்கும் இழிசெயலையும் மனித சமூகத்தினர் தொடர்ந்து செய்து வந்தனர். இந்த நிலையை மாற்றிடவென்றே மஹாகவி,

கற்பு நிலையென்று சொல்ல வந்தார் இரு
கட்சிக்கும் அஃது பொதுவில் வைப்போம்
வற்புறுத்திப் பெண்ணைக் கட்டிக் கொடுக்கும்
வழக்கத்தைத் தள்ளி மிதித்திடுவோம்

என்று முழங்கினார்.

பழங்காலக் கதைகளாயினும் பெண்ணடிமை ஒழிந்து, தாதர் என்ற நிலைமை மாறி ஆண்களோடு பெண்களும் சரிநிகர் சமானமாக வாழ்ந்துவரும் தற்காலத்தில் எழுதப் பட்ட சில கதைகளாயினும் பொதுவாக, முறையாக இல்லறத்தில் ஈடுபடாமல் மனைவியைப் புறந்தள்ளிவிட்டு விலைமாதர்களைத் தேடியலையும் ஆண்கள் தம் வாழ்வை இழந்த துயரச் சம்பவங்களே காட்டப்பட்டு வருவதும் நாம் அனைவரும் அறிவோம்.

இத்தகைய கதைகள் சமுதாயத்தில் உள்ள பிறருக்கு ஒரு எச்சரிக்கையாக அமைந்து பெரும்பாலானோர் தவறு செய்யத் துணியாது கட்டுப்பாட்டுடன் வாழ வழிகோலுகின்றன. இத்தகைய கதைகளுள் பல திரைப்படங்களாகவும் தயாரிக்கப் பட்டுள்ளன. அவற்றுள் மிகவும் குறிப்பிடத்தக்க திரைப்படம் ரத்தக்கண்ணீர். இப்படத்தில் நடிகவேள் அதாவது நடிகர்களுள் ஒரு மன்னர் எனப் புகழ்பெற்ற எம்.ஆர். ராதா முக்கிய வேடமேற்று நடித்துள்ளார். தற்போது இடம்பெறும் தமிழ்த் தொலைக்காட்சித் தொடர்கள் பலவற்றில் மிகவும் முன்னணியில் விளங்கும் திருமதி ராதிகா அவர்கள் நடிகவேள் எம்.ஆர். ராதா அவர்களது தவப்புதல்வி என்பதை அனேகமாக நாம் அனைவரும் அறிவோம். அறியாதவர்கள் அறிந்து கொள்வார்களாக.

குற்றம் புரிந்தவன்

திரைப்படம்: ரத்தக்கண்ணீர்
இயற்றியவர்: தஞ்சை ராமையா தாஸ்
இசை. ஜி. ராமநாதன்
பாடியவர்: சி.எஸ். ஜெயராமன், எம். ஆர். ராதா
ஆண்டு: 1954
குற்றம் புரிந்தவன் வாழ்க்கையில் நிம்மதி
கொள்வதென்பதேது?
குற்றம் புரிந்தவன் வாழ்க்கையில் நிம்மதி
கொள்வதென்பதேது?

ஆம், ஆம், வாழ்க்கையில் குற்றங்களைப் புரிந்த எனக்கு நிம்மதி ஏது?

அற்றது உலகில் அமைதியும் மகிழ்வும்
அற்றது உலகில் அமைதியும் மகிழ்வும்
அரும்பிட முடியாது?

முடியாது, உண்மை, உண்மை என் ஆணந்தம், என் மகிழ்ச்சி, என் இன்பம் அத்தனையும் அற்றுப் போய்விட்டது.

அமைதி அழிந்தது, புயலும் எழுந்தது
ஆணவம் இன்றோடொழிந்தது
அமைதி அழிந்தது, புயலும் எழுந்தது
ஆணவம் இன்றோடொழிந்தது

ஒழிந்தது, ஒழிந்தது, என் ஆணவன், என் கர்வம், என் அகம்பாவம் அத்தனையும் அற்றுப் போய்விட்டது.

குணத்தை இழப்பவன் இறுதியிலே - நல்ல
சுகம் அடைவதேது - நல்ல
குணத்தை இழப்பவன் இறுதியிலே - நல்ல
சுகம் அடைவதேது?

வாஸ்தவம் குணத்தை இழந்தேன் கொண்டவளைத் துறந்தேன், கண்டவள் பின் சென்றேன், கட்டுடலையும் இழந்தேன் இன்று கண்ணையும் இழந்தேன். வாழ்க்கையில் எனக்கு நிம்மதி ஏது?

குற்றம் புரிந்தவன் வாழ்க்கையில் நிம்மதி
கொள்வதென்பதேது?

இன்பம் எங்கும் இங்கே

தற்காத்து தற்கொண்டாற் பேணித் தகைசான்ற
சொற்காத்துச் சோர்விலாள் பெண்

எனும் குறளில் வள்ளுவர், மனைவி எனும் உயரிய இடத்தைப் பெற்ற பெண்ணின் இலக்கணத்தைத் தெள்ளத் தெளிவாக விளக்குகிறார். மனைவியானவள் முதற்கண் தன்னைக் காத்துக்கொண்டு தனது கணவனைப் பேண வேண்டும். அதாவது தனது உடல் நலத்தையும் தன்மானத்தையும் சமுதாயத்தில் ஒரு இல்லத்தரசிக்குரிய மரியாதையையும் காத்துக்கொண்டு கணவனது தேவைகளறிந்து பணிவிடை செய்து அவனது உடல் நலம், தன்மானம் மற்றும் மரியாதையை நிலைநிறுத்த வேண்டும். அதன் பின்னர் தகுதிவாய்ந்த பெருமை கொள்ளத் தக்க சொற்களைப் பேசி தனது வாக்கைக் காப்பாற்றி எக்காலத்தும் தனது கடமையை சோர்வின்றிச் செய்ய வேண்டும் என்பதே இக்குறள் கூறும் நெறியாகும்.

மனைவி என்பவள் வாழ்க்கைத் துணைவியாவாள். தன் வாழ்நாள் உள்ளளவும் தன்னுடைய கணவனுக்கு அவனது கடமைகள் அனைத்திலும் உறுதுணையாக விளங்குவதுடன் அவனுடை சுகதுக்கங்களில் பங்கு கொண்டு அவனது வாழ்வை மகிழ்ச்சி நிறைந்ததாக அமைக்க வேண்டும். நமது பாரத சமுதாயத்தில் குடும்பப் பெண்களுள் பெரும்பாலோர் இத்தகைய உன்னதமான பணியை ஒழுங்காகச் செந்து வருவதாலேயே தொன்று தொட்டு உலகில் உள்ள அனைத்து நாடுகளையும் விட நமது நாடு கலாச்சாரத்தில் உயர்ந்ததாகக் கருதிப் போற்றப் படுகிறது.

இத்தகைய பெண்ணைப் பெண்ணரசி என்று நம் முன்னோர்கள் புகழ்ந்தனர். பெண்மையை ஆளும் உன்னத குணம் வாய்ந்தவள் என இதற்குப் பொருள் கொள்ளலாம். இத்தகைய பெண்களை நாம் எங்கும் தேட வேண்டியதில்லை. நம்முடனே இன்று பழகும் மூத்த நண்பர்களிடையே நாம் இத்தகைய பெண்களைக் காண முடியும்.

மழலைகளின் அன்புக்குரிய தாத்தாவான சீனுத் தாத்தாவின் அன்புக்குரிய மனைவியான சரோஜா பாட்டி இன்று நம்மிடையே வாழும் பெண்ணரசிகளுள் ஒருவர். 80 வயதை நெருங்கும் சீனு தாத்தாவுடன் அவர் இன்றும் மிகவும் மகிழ்ச்சியாக வாழ்கிறார். திருமணமான புதிதில் கணவனிடம் அன்பு கொண்ட ஒரு மனைவி கணவனிடத்தே எத்துணை வாஞ்சையைப் பொழிவாரோ அதை விடவும் மேலான அன்பைத் தன் கணவரிடம் கொண்டுள்ள நிலை கீழ்க்கண்ட இணையப் பக்கத்திலும் அதனுடன் இணைந்துள்ள பிற பக்கங்களிலும் விளங்கும்.

http://mazhalaigal.com/entertainment/photo/photo-001/0716vs11s_snow.php

தாத்தாவும் பாட்டியும் சிறு குழந்தைகள் போல விளையாடுவது கண்டு துள்ளாத மனமும் துள்ளும்.

சரோஜா பாட்டிக்கு இன்று பிறந்த நாள். இந்த நன்னாளில் அவரை வாழ்த்தி வணங்கி அவரது நல்லாசிகளை வேண்டுகிறோம். அவரும் சீனு தாத்தாவும் வாழ்வது போலவே நாம் அனைவரும் நம் வாழ்நாள் முழுவதும் என்றும் ஆனந்தம் பொங்கும் நல்வாழ்வு வாழ வேண்டுமென இறைவனை வேண்டுவோம்.

சரோஜா பாட்டிக்கு இன்றைய பாடலைக் காணிக்கையாக்கி அவர் இருக்கும் இடத்தில் இன்பம் என்றும் ஆட்சி புரிய வேண்டுமென இறைவனை வேண்டுகிறேன்.

இன்பம் எங்கும் இங்கே

திரைப்படம்: பெண்ணரசி
இயற்றியவர்: ஏ. மருதகாசி
இசை: கே.வி. மஹாதேவன்
பாடியோர்: எம்.எஸ். ராஜேஸ்வரி, திருச்சி லோகநாதன்

இன்பம் எங்கும் இங்கே ஆட்சி புரியுது
இன்பம் எங்கும் இங்கே ஆட்சி புரியுது
இயற்கையிலே யாவும் இணைந்தாடுது
ஜீவ சுகம் தேடுது
இன்பம் எங்கும் இங்கே ஆட்சி புரியுது
இயற்கையிலே யாவும் இணைந்தாடுது
ஜீவ சுகம் தேடுது

இன்பம் எங்கும் இங்கே ஆட்சி புரியுது
இன்பம் எங்கும் இங்கே ஆட்சி புரியுது
இனிமையிலே யாவும் இணைந்தாடுது
வாழ்வின் துணை தேடுது
இன்பம் எங்கும் இங்கே ஆட்சி புரியுது
இனிமையிலே யாவும் இணைந்தாடுது
வாழ்வின் துணை தேடுது
இன்பம் எங்கும் இங்கே ஆட்சி புரியுது

ஆஆஆஆஆஆஆஆஆஆஆஆஆஆ
ஆஆஆஆஆஆஆஆஆஆஆஆஆஆ

பொங்கி வரும் நிலவைக் கண்டு
அல்லி முகம் சிவக்குது
போதையூட்டும் தேனைச் சிந்தி
ஜாதிமல்லி சிரிக்குது
சிந்து பாடி வண்டு தேன் தேடும் காட்சி கண்டு
சிந்தை மயங்கிக் காதல் பண் பாடுது
சிந்தை மயங்கிக் காதல் பண் பாடுது

இன்பம் எங்கும் இங்கே ஆட்சி புரியுது

அன்பு மயமான இந்த உலகிலே ஓஓஓஓஓ
பலரறிய அரசன் அரசியாவோம் விரைவிலே
ஆ.ஆ.ஆ.ஆஆஆஆஆஆஆஆ

உலவும் தென்றலிலே உல்லாசம் காணுவோம்
நிலவும் வானும் போல குலவி மகிழுவோம்
என்னைப் போரில் வெற்றி கண்ட என்னுயிர் ஜோதியே
என்னையே வென்றவளே ஈடில்லாப் பெருநிதியே
என்னைப் போரில் வெற்றி கண்ட என்னுயிர் ஜோதியே
என்னையே வென்றவளே ஈடில்லாப் பெருநிதியே
இசைந்த காதல் வாழ்வின் ஆனந்தமே
இசைந்த காதல் வாழ்வின் ஆனந்தமே

இன்பம் எங்கும் இங்கே ஆட்சி புரியுது
இயற்கையிலே யாவும் இணைந்தாடுது
ஜீவ சுகம் தேடுது
இன்பம் எங்கும் இங்கே ஆட்சி புரியுது

மடி மீது தலை வைத்து

உறவின்றி உலக வாழ்வில்லை. ஒருவரும் தனக்கென மட்டும் வாழ இயலாது. இன்ப துன்பங்களையும் மற்ற பல பொருட்களையும் செயல்பாடுகளையும் பலரும் பகிர்ந்து அனுபவித்தலே வாழ்க்கையாகும். இவ்வுலகில் பிறந்த நாள் முதல் சில காலம் வரை பெற்றோரும் உற்றாரும் பெரும்பான்மையான உறவாக விளங்கினாலும் வளர்ந்து உலக வாழ்க்கையெனும் போராட்டத்தில் ஈடுபட்டுப் பாடுபடும் காலம் வருகையில் நண்பர்களும் சமூகத்தினருமே பெரும்பான்மையான உறவாக அமைகின்றனர்.

இதற்கிடையில் உரிய காலம் வருகையில் பலருக்கு இல்லற வாழ்வு பெற்றோரால் அமைத்துத் தரப்படுகிறது. ஒரு சில அதிர்ஷ்டசாலிகளுக்கு மட்டுமே தம் மனதைக் கவர்ந்த ஒருவரோடு காதல் ஏற்பட்டு, அக்காதல் கனிந்து கல்யாணத்தில் நிறைவடையும் இனிய வாழ்வு அமைகிறது.

காதலில் அதிக இன்பம் தருவது காதல் கொண்ட ஆணும் பெண்ணும் ஒருவரை மற்றவர் விட்டுப் பிரியாமையை விரும்பும் நிலையே. இரு மனங்கள் ஒன்றாய் இணைந்த பின்னர் அங்கே புணர்ச்சி பழகுதல் அவசியமற்றதாகிறது. துணை தேடும் மனங்களுக்குத் தக்க வாழ்க்கைத் துணையைத் தேடித் தருவதே காதல். மற்றதெல்லாம் காதல் ஆகாது.

சின்னஞ்சிறு வயதில் உலக வாழ்வில் படும் துன்பங்களை மறக்க ஒருவருக்குத் தேவை தஞ்சமென அடைய ஒரு தாயின் மடி. வளர்ந்து பருவமடைந்த பின்னர் அத்தாயின் மடி பலருக்குக் கிடைப்பதில்லை. தாயின் மடி கிடைக்காவிடிலென்ன, கனவிலும் மறவாக் காதல் உறவு கொண்ட அன்பரின் மடியே அடைக்கலம் என்று அடைவது பேரின்பமல்லவா!

மடி மீது தலை வைத்து

திரைப்படம்: அன்னை இல்லம்
இயற்றியவர்: கவிஞர் கண்ணதாசன்
இசை: கே.வி. மஹாதேவன்
பாடியோர்: டி.எம். சௌந்தரராஜன், பி. சுசீலா

மடி மீது தலை வைத்து விடியும் வரை தூங்குவோம்
மறு நாள் எழுந்து பார்ப்போம்
மடி மீது தலை வைத்து விடியும் வரை தூங்குவோம்
மறு நாள் எழுந்து பார்ப்போம்
மடி மீது தலை வைத்து விடியும் வரை தூங்குவோம்
மறு நாள் எழுந்து பார்ப்போம்

மங்கலக் குங்குமம் நெஞ்சிலே மல்லிகை மலர்கள் மண்ணிலே
மங்கலக் குங்குமம் நெஞ்சிலே மல்லிகை மலர்கள் மண்ணிலே
பொங்கிய மேனி களைப்பிலே பொழுதும் புலரும் அணைப்பிலே
ஆஹா ஓஹோ ம்ம்ம்

மடி மீது தலை வைத்து விடியும் வரை தூங்குவோம்
மறு நாள் எழுந்து பார்ப்போம்

இரவே இரவே விடியாதே இன்பத்தின் கதையை முடிக்காதே
இரவே இரவே விடியாதே இன்பத்தின் கதையை முடிக்காதே
சேவல் குரலே கூவாதே சேவல் குரலே கூவாதே
சேர்ந்தவர் உயிரைப் பிரிக்காதே சேர்ந்தவர் உயிரைப் பிரிக்காதே

மடி மீது தலை வைத்து விடியும் வரை தூங்குவோம்
மறு நாள் எழுந்து பார்ப்போம்

வாயின் சிவப்பு விழியிலே மலர்க்கண் வெளுப்பு இதழிலே
வாயின் சிவப்பு விழியிலே மலர்க்கண் வெளுப்பு இதழிலே
காயும் நிலவின் அழகிலே காலம் நடக்கும் உறவிலே

மடி மீது தலை வைத்து விடியும் வரை தூங்குவோம்
மறு நாள் எழுந்து பார்ப்போம்

மன்னவனே அழலாமா

இள வயதில் மனைவியை இழந்த ஆண்கள் சிலர் தமது குழந்தைகளின் நலனுக்காக மற்றொரு பெண்ணைத் திருமணம் புரிந்து கொள்வதுண்டு. வேறு சிலர் வாழ்நாள் முழுவதும் தம் மனைவியின் நினைவாகவே வாழ்ந்து தமது குழந்தைகளுக்குத் தாமே தாயும் தந்தையுமாக இருந்து அனைத்து விதங்களிலும் அவர்களது வளர்ச்சிக்கு உதவுவதும் உண்டு. தன் மனைவி இறந்த பின்னர் வேறொரு பெண்ணைத் திருமணம் செய்து கொள்ள விருப்பம் இல்லாத ஆண்கள் தம் குழந்தைகளைக் காக்க அவர்களுக்குத் தாயாய் விளங்க வேறொரு பெண் அவசியமாக இருக்குமாயின் குழந்தைகளின் நலனுக்காக வேறொரு பெண்ணைத் திருமணம் செய்து கொள்வதும் உண்டு. இத்தகைய முடிவுக்குக் குடும்பத்தில் இருக்கும் பிற உறவினர்களின் வற்புறுத்தலும் காரணமாக அமைவதுண்டு.

இவ்வாறு தம் விருப்பத்துக்கு மாறாக சந்தர்ப்ப சூழ்நிலைகளால் உந்தப்பட்டு வேறொரு பெண்ணை மணந்த ஆண்களுள் சிலர் தம் மனைவியின் நினைவு மனதில் என்றும் இருக்கும் நிலையில் புதிதாய் மணந்த பெண்ணை மனைவியாக ஏற்று அப்பெண்ணுடன் மனமொப்பி வாழத் தயங்குவதுண்டு. இத்தகைய தயக்கத்தினால் அந்தப் பெண் மனம் வருந்துவதும் உண்டு. தன் குழந்தைகளுக்குத் தாயாகவும் தனக்கு இரண்டாம் தாரமாகவும் வந்து வாய்த்த அப்பெண்ணிற்கும் வாழ்வில் ஆசாபாசங்கள் உண்டு என்பதை உணர்ந்து கொண்டு அக்கணவன் அவளை உரிய அன்புடன் நடத்தி அவளிடம் இணங்கி வாழ்வது அப்பெண்ணுக்கும் அக்கணவனுக்கும் மட்டுமன்றி அவர்களது குழந்தைகளுக்கும் நல்வாழ்வை அளிக்கும்.

புதிதாய் மணந்த பெண்ணுடன் சகஜமாய் வாழத் தயங்கித் தன் மனைவியின் நினைவால் தொடர்ந்து வாடும் சில ஆண்களுக்கு குடும்பத்திலுள்ள மூத்த உறவினர்கள் மற்றும் நண்பர்கள் தக்க அறிவுரை கூறித் திருத்துவதுண்டு. ஆனால் இத்தகைய ஆண் ஒருவனுக்கு இறந்து போன அவனது மனைவியே அவனது மனதுக்குள் வந்து தன்னையே நினைத்து வருந்துவதை நிறுத்திவிட்டு, தனக்குப் பின் அவனுக்கு மனைவியாய் வாழவந்த பெண்ணை முறையாக மதித்து வாழும்படி அறிவுரை கூறுவதாக அமைந்ததொரு அரிய பாடல் இன்றைய பாடலாக மலர்கிறது.

மன்னவனே அழலாமா

ஆ..ஆஆஆ. ஆஆஆஆஆ
ஆ..ஆஆஆ. ஆஆஆஆஆ
ஆஆ ஆஆ ஆஆ ஆஆ

மன்னவனே அழலாமா கண்ணீரை விடலாமா?
உன்னுயிராய் நானிருக்க என்னுயிராய் நீயிருக்க
மன்னவா மன்னவா மன்னவா
மன்னவனே அழலாமா கண்ணீரை விடலாமா?
உன்னுயிராய் நானிருக்க என்னுயிராய் நீயிருக்க

கண்ணை விட்டுப் போனாலும் கருத்தை விட்டுப் போகவில்லை
கண்ணை விட்டுப் போனாலும் கருத்தை விட்டுப் போகவில்லை
மண்ணை விட்டுப் போனாலும் உன்னை விட்டுப் போகவில்லை
மண்ணை விட்டுப் போனாலும் உன்னை விட்டுப் போகவில்லை
இன்னொருத்தி உடலெடுத்து இருப்பவளும் நானல்லவா?
கண்ணெடுத்தும் பாராமல் கலங்குவதும் வீணல்லவா?
மன்னவா மன்னவா மன்னவா

மன்னவனே அழலாமா கண்ணீரை விடலாமா?
உன்னுயிராய் நானிருக்க என்னுயிராய் நீயிருக்க

உன்மயக்கம் தீர்க்கவந்த பெண்மயிலைப் புரியாதா?
உன்மயக்கம் தீர்க்கவந்த பெண்மயிலைப் புரியாதா?
தன்மயக்கம் தீராமல் தவிக்கின்றாய் தெரியாதா?
தன்மயக்கம் தீராமல் தவிக்கின்றாய் தெரியாதா?
என்னுடலில் ஆசையென்றால் என்னை நீ மறந்து விடு
என்னுயிரை மதித்திருந்தால் வந்தவளை வாழவிடு

மன்னவனே அழலாமா கண்ணீரை விடலாமா?
உன்னுயிராய் நானிருக்க என்னுயிராய் நீயிருக்க

இறைவன் படைத்த உலகை எல்லாம்

மனிதன் உலக வாழ்வில் தொடர்ந்து இன்பம் பெறுகையில் தன்னை மறந்து சக மனிதர்களையும் மறந்து, தன்னை வந்தெய்திய இன்பத்தைத் துய்ப்பதிலேயே ஈடுபடுகிறான். இடையில் ஒரு சிறு துன்பம் வரினும் அதைத் தாங்கும் வலுவின்றி அத்துனபத்தை நீக்கப் பிறர் உதவியையும் இறையருளையும் நாடுகிறான். இது சாமான்யர்களின் நிலை. இதற்கு மாறாக ஞானிகள் இன்பம் வரினும் துன்பம் வரினும் எக்காலத்தும் இறையருளையே வேண்டி இன்பத்தில் மூழ்கித் தன்னை இழக்காமல், துன்பத்தில் வருத்தமுறாமல் திட சித்தத்துடன் எல்லாம் அவன் செயல் எனும் ஏகாக்ர
சித்தத்துடன் தியான நிலையிலேயே வாழ்கின்றனர்.

உடம்பு அழியும் தன்மை வாய்ந்தது. ஆன்மா அழிவில்லாதது. நீயோ நானோ இதற்கு முன்னர் இல்லாதிருந்ததும் இல்லை இவ்வுடம்பு மண்ணோடு மண்ணாகி மறைந்த பின்னர் இல்லாது போவதும் இல்லை. இவ்வுடம்புக்குரிய அடையாளமாக வைக்கப்பட்ட பெயரால் நாம் அறியப்படுவது மாயை. இவ்வுடம்புக்குரியவராக நம்மை நாமே எண்ணிக்கொண்டு இவ்வுடம்புக்கொரு துன்பம் வருகையிலோ இவ்வுடம்பைச் சேர்ந்து அதன் வடிவாகவே இயங்கும் மனதுக்கொரு துக்கம் வருகையிலோ வருந்தி வாடுவது அறியாமையே. பிறப்பு என்றிருந்தால் இறப்பு என்று நிச்சயம உண்டு என்பது இயற்கை நியதி. அதிலிருந்து யாரும் மீள இயலாது.

மனிதன் பிற அனைத்து உயிர்களை விடவும் மேலான அறிவு படைத்தவன். மனிதராகப் பிறந்த நாம் செய்யத் தக்கது இறைவனைச் சரணடைந்து இன்பதுன்பங்களில் உழலாமல் பிறவியில்லாத நிலையடைய முயல்வதே ஆகும்.

பிறவிப் பெருங்கடல் நீந்துவர் நீந்தார்
இறைவனடி சேரா தார்.

"குளிர் - வெம்மை, இன்பம் - துன்பம் எனும் இவற்றை விளைக்கும் இயற்கையின் அனுபவங்கள், தெய்வ கிருமையால் சாசுவதமல்ல. அநித்தியமானவை. தோன்றி மறையும் இயல்புடையன. ஆதலால் இவற்றைக் கண்டவிடத்தே நெஞ்சமிளகுதலும் நெஞ்சுடைந்து மடிதலும் சால மிகப் பேதமையாமன்றோ? ஆதலால் இவற்றைக் கருதி எவனும் மனத்துயரப் படுதல் வேண்டா. அங்ஙனம் துயரப் படாதிருக்கக் கற்பான் சாகாமலிருக்கத் தகுவான்." என்று கீதை உரைப்பதை மஹாகவி பாரதியார் விளக்குகிறார்..

இத்தகைய மனப்பக்குவத்தை அடைய இறையருள் அவசியம். இறைவன் எங்கும் நிறைந்திருந்தாலும் நம்மைப் போன்ற சாமான்ய மனிதர்கள் அரூபமான நிலையில் இறைவனை அடைவது கடினம். இதன் காரணம் வாழ்வில் நம்மைப் பாதிக்கும் விஷயங்கள் நம் கவனத்தை திசைதிருப்பி விடுவதேயாகும். இதற்கொரு உபாயமாகவே நம் முன்னோர்கள் ஆலயங்களை ஏற்படுத்தி, அங்கு வருவோர் இறையுணர்வுடன் இயங்கும் சூழ்நிலையை உருவாக்கி உலகுக்கு வழி காட்டியுள்ளனர்.

"ஆலயம் தொழுவது சாலவும் நன்று" என்று ஔவைப் பிராட்டி மொழிந்ததும் இதன் காரணமாகவே ஆகும்.

இறைவன் படைத்த உலகை எல்லாம்

திரைப்படம்: வா ராஜா வா
இயற்றியவர்: நெல்லை அருள்மணி
இசை: குன்னக்குடி வைத்தியநாதன்
பாடியவர்: சீர்காழி கோவிந்தராஜன்

இறைவன் படைத்த உலகை எல்லாம்
மனிதன் ஆளுகின்றான்
மனிதன் வடித்த சிலையில் எல்லாம்
இறைவன் வாழுகின்றான்
இறைவன் வாழுகின்றான்
இறைவன் படைத்த உலகை எல்லாம்
மனிதன் ஆளுகின்றான்
மனிதன் வடித்த சிலையில் எல்லாம்
இறைவன் வாழுகின்றான்
இறைவன் வாழுகின்றான்

உள்ளம் சொல்வதை உதடு சொல்லாமல்
உண்மை பிறப்பதில்லை
உள்ளம் சொல்வதை உதடு சொல்லாமல்
உண்மை பிறப்பதில்லை
உள்ளிருந்தே நீ அருள் செய்யாமல்
ஒன்றும் நடப்பதில்லை
உள்ளிருந்தே நீ அருள் செய்யாமல்
ஒன்றும் நடப்பதில்லை
ஒன்றும் நடப்பதில்லை

இறைவன் படைத்த உலகை எல்லாம்
மனிதன் ஆளுகின்றான்
மனிதன் வடித்த சிலையில் எல்லாம்
இறைவன் வாழுகின்றான்
இறைவன் வாழுகின்றான்

இரண்டு மனிதர் சேர்ந்த போது
எண்ணம் வேறாகும்
இரண்டு மனிதர் சேர்ந்த போது
எண்ணம் வேறாகும்
எத்தனை கோவில் இருந்த போதும்
இறைவன் ஒன்றாகும்
எத்தனை கோவில் இருந்த போதும்
இறைவன் ஒன்றாகும்
இறைவன் ஒன்றாகும்

இறைவன் படைத்த உலகை எல்லாம்
மனிதன் ஆளுகின்றான்
மனிதன் வடித்த சிலையில் எல்லாம்
இறைவன் வாழுகின்றான்
இறைவன் வாழுகின்றான்

இசையால் அவனை இரங்க வைப்பது
மனிதன் குணமாகும்
இசையால் அவனை இரங்க வைப்பது
மனிதன் குணமாகும்
இசையில் மயங்கி இரங்கி வருவது
இறைவன் மனமாகும்
இசையில் மயங்கி இரங்கி வருவது
இறைவன் மனமாகும்
இறைவன் மனமாகும்

இறைவன் படைத்த உலகை எல்லாம்
மனிதன் ஆளுகின்றான்
மனிதன் வடித்த சிலையில் எல்லாம்
இறைவன் வாழுகின்றான்
இறைவன் வாழுகின்றான்