உலகம் சமநிலை பெற வேண்டும்

இறைவன் நாம் வாழ்வதற்கு எல்லா வளங்களையும் அளித்திருந்தும் தம்மிடையே அவற்றைப் பகிர்ந்து கொண்டு இன்பமாய் வாழ மனமின்றி சுயநலத்தால் மதிமயங்கிய மாந்தர்கள் சமுதாயத்தில் ஏற்றத் தாழ்வுகள் வளரக் காரணமாகின்றனர். இதனால் மனிதர்களுக்குள்ளே பல்வேறு வகைகளிலும் கருத்து வேறுபாடுகளும் சண்டை சச்சரவுகளும் பெருகி சமூக அமைதி குலைகிறது. மனிதர்களை மிருகங்களிடமிருந்து மேம்படுத்தி உயர்வைத் தரும் கட்டுக்கோப்பான சமுதாய அமைப்பின் சட்டதிட்டங்கள் யாவினையும் மீறி அநீதிப் பாதையில் செயல்படும் வலிமையுள்ளவர்கள் செல்வந்தர்களாக வாழ்கையில் வலிமையற்ற மனிதர்கள் குறைந்த வருவாயில் வாயைக்கட்டி வயிற்றைக் கட்டி வாழ வேண்டிய ஏழ்மையில் தள்ளப்படுகின்றனர்.

பல்வேறு காரணங்களால் சமூக நீதி நிலைபெறாமையால் ஏழைகள் மேலும் ஏழைகளாகையில் செல்வத்தர்கள் மேலும் செல்வந்தர்கலாகின்றனர். இந்நிலை தொடர்கையில் ஏழ்மையில் தள்ளப்பட்ட மனிதர்கள் மனம் நொந்து வாடும் நிலை தொடர்கிறது. இம்மன வாட்டம் நாளடைவில் பெரும் கோபமாக உருவெடுத்து அத்தகைய கோபம் முற்றுகையில் கலவரமாக வெடித்து பொது சொத்துகளுக்கு சேதாரம் ஏற்பட்டு மனிதர்கள் ஒருவரையொருவர் தாக்கிக்கொண்டு மடியக்கூடிய அளவுக்குப் பெரும் கேடாக முடிகிறது. இத்தகைய சமூக நிலை உருவாவது ஒரு நாட்டின் வளர்ச்சியைப் பாதித்துப் பெரும் வீழ்ச்சியை சந்திக்க நேரிடுகிறது. எகிப்து, லிபியா உட்பட உலக நாடுகள் பலவற்றிலும் சமீப காலத்தில் ஏற்பட்ட கலவரங்களும் உள்நாட்டுப் போரும் நம் நாட்டில் ஏற்படாமல் தடுப்பது இந்திய மக்கள் அனைவரின் தலையாய கடமையாகும். இதற்கு ஒரே வழி சமூக நீதி நிலைநாட்டப்பட்டு மக்களிடையே நிலவும் ஏற்றத் தாழ்வுகள் குறைந்து அனைவரும் சம அந்தஸ்தைப் பெற்று அமைதியாகவும் ஒற்றுமையாகவும் வாழ ஏற்ற சூழ்நிலை உருவாக்கப்படுவதேயாகும்.

அத்தகைய சம நிலை உலகில் ஏற்பட வேண்டுமெனில் மனிதர்கள் அறியாமை இருளிலிருந்து மீண்டு அறிவொளி பெற வேண்டும். அதற்கு ஒவ்வொரு நாட்டிலும் மக்கள் நலம் பேணும் நல்லாட்சி மலர வேண்டும். உலக நாடுகளிடையே ஒற்றுமை வளர வேண்டும். போர், பகை அச்சம் நீங்கி வளர்ச்சிப்பாதையில் உலகம் செல்ல வேண்டும். போதும் என்ற மனம் கொண்டு மனிதர் யாவரும் பேராசை நீக்கி இருப்பதைக் கொண்டு தானும் சிறப்புடன் வாழ்ந்து பிறருக்கும் அளித்து உலக மக்கள் யாவரும் ஒருவர் பெற்ற மக்களே எனும் ஒரு உன்னத நிலையில் ஒருங்கிணைந்து வாழ வேண்டும். அப்பொழுது உலகம் நிலைபெற்று இயற்கை வளங்கள் பெருகி அழிவுப்பாதையிலிருந்து மீண்டு செழிக்கும்.

உலகம் சமநிலை பெற வேண்டும்

திரைப்படம்: அகத்தியர்
பாடியவர்: சீர்காழி கோவிந்தராஜன்
இயற்றியவர்: உளுந்தூர்ப் பேட்டை சண்முகம்
இசை: குன்னக்குடி வைத்தியநாதன்
ஆண்டு: 1972
உலகம் சமநிலை பெற வேண்டும்
உயர்வு தாழ்வில்லா நிலை வேண்டும்
உலகம் சமநிலை பெற வேண்டும்
உயர்வு தாழ்வில்லா நிலை வேண்டும்
நிறைவே காணும் மனம் வேண்டும்
இறைவா அதை நீ தர வேண்டும்
நிறைவே காணும் மனம் வேண்டும்
இறைவா அதை நீ தர வேண்டும்
உலகம் சமநிலை பெற வேண்டும்
உயர்வு தாழ்வில்லா நிலை வேண்டும்

இமயமும் குமரியும் இணைந்திடவே
எங்கும் இன்பம் விளைந்திடவே
சமயம் யாவும் தழைத்திடவே
சத்தியம் என்றும் நிலைத்திடவே

உலகம் சமநிலை பெற வேண்டும்
உயர்வு தாழ்வில்லா நிலை வேண்டும்
நிறைவே காணும் மனம் வேண்டும்
இறைவா அதை நீ தர வேண்டும்
உலகம் சமநிலை பெற வேண்டும்
உயர்வு தாழ்வில்லா நிலை வேண்டும்

அறிவும் அன்பும் கலந்திடவே
அழவில் வையம் மலர்ந்திடவே

நெறியில் மனிதன் வளர்ந்திடவே
நேர்மை நெஞ்சில் நிறைந்திடவே

உலகம் சமநிலை பெற வேண்டும்
உயர்வு தாழ்வில்லா நிலை வேண்டும்
நிறைவே காணும் மனம் வேண்டும்
இறைவா அதை நீ தர வேண்டும்
உலகம் சமநிலை பெற வேண்டும்
உயர்வு தாழ்வில்லா நிலை வேண்டும்

அன்பு நடமாடும் கலைக்கூடமே

அன்பிலார் எல்லாம் தமக்குரியர் அன்புடையார்
என்பும் உரியர் பிறர்க்கு

எனும் குறள் வழி நின்று சுயநலம் நீக்கிப் பொதுநலம் பாராட்டும் உத்தமர்கள் பலரும் உலகில் இருப்பதாலேயே உலகில் உயிர் வாழ்க்கை நிலைபெற்று வருகிறது. சுயநலவாதிகளால் இயற்கை வளங்கள் அழிக்கப்பட்டு வரும் முறைகேடுகள் பல நிகழ்ந்த போதிலும் அவற்றை அனைவரும் அறியும் வண்ணம் எடுத்துரைத்துப் பாதுகாக்க உரிய நடவடிக்கை எடுக்கப்பட வேண்டியதன் அவசியத்தை இத்தகைய பொதுநலவாதிகள் தொடர்ந்து விளக்கி வருவதுடன் அதற்கான விழிப்புணர்வை ஏற்படுத்தி வருவதாலேயே சமுதாயம் பாதுகாக்கப் படுகிறது.

நெல்லுக்கிறைத்த நீர் வாய்க்கால் வழியோடிப்
புல்லுக்குமாங்கே பொசியுமாம் தொல்லுலகில்
நல்லார் ஒருவர் உளரேல் அவர் பொருட்டு
எல்லோர்க்கும் பெய்யும் மழை

எனும் ஔவை மூதாட்டியின் வாக்குக்கிணங்க சமுதாய சேவையே வாழ்க்கையாகக் கொண்டு திகழும் உன்னத மாந்தர் பலர் உள்ளதாலேயே அறியாமையால் தவறு செய்யப் புகும் பலரும் மனம் திருந்தி நல்வழி செல்லும் நிலை உருவாகியுள்ளது.

மக்களைக் காக்க வேண்டிய அரசுகள் கடந்த பல ஆண்டுகளாக அரசுத்துறையில் இயங்கி வந்த தொழில்கள் பலவற்றையும் தனியாருக்கு தாரைவார்த்ததனால் நாட்டின் வளங்கள் யாவும் சிறிது சிறிதாக சுரண்டப்படுவதுடன் வரி ஏய்ப்பு அதிகரித்து செல்வந்தர்கள் மேலும் அதிக செல்வந்தர்களாவதும் ஏழை மக்கள் மேலும் ஏழ்மைப்பட்டு அன்றாடம் உண்ண உணவுக்கு உடுக்கும் உடைக்கும், உறையும் இடத்துக்கும், குழந்தைகளின் கல்விக்கும், மருத்துவ வசதிகளுக்கும், போக்கு வரத்துக்கும் போதிய பணத்த ஈட்ட வழியின்றி விலைவாசி உயர்வினால் துன்புற்று வாடுகையில், துன்பப்படும் மக்களுக்கு தைரியமூட்டி, முறையாகத் தங்களுக்குக் கிடைக்க வேண்டிய அடிப்படைத் தேவைகளைப் பூர்த்தி செய்துகொள்ள உரிய வசதிகளைப் பெறும் மார்க்கத்தை இப்பொதுநல சேவகர்கள் காட்டி வருகின்றனர்.

இப்பொதுநல வாதிகள் பலரும் ஒன்று திரண்டு ஒரு பேரியக்கத்தை உருவாக்கி செயல்படும் நிலை தற்போது ஏற்பட்டுள்ளது மகிழ்ச்சிக்குரியதாகும். தவறு செய்யும் அரசியல்வாதிகளும் அதிகாரிகளும் தண்டனையிலிருந்து தப்பிக்க இயலாத சூழ்நிலை சிறிது சிறிதாக உருவாகி வருவது ஆறுதல் தருவதாக உள்ளது.

மனிதர்களாகப் பிறந்த நாம் ஏன் பிறந்தோம்? நமக்கு முற்பிறவியும் மறுபிறவியும் உண்டா இல்லையா? அவ்வாறு இருந்தால் முற்பிறவியில் நாம் யாராக இருந்தோம்? மறுபிறவியில் யாராக இருப்போம்? எனபன போன்ற பல கேள்விகளுக்கும் விடை தெரியாமல் மாயையில் சிக்குண்டு இவ்வுலகம் சாஸ்வதமென்று எண்ணி பொருள் தேடுவதிலும் சிற்றின்பங்களை அனுபவிப்பதிலுமே நேரத்தை செலவழித்து அர்த்தமற்ற வாழ்க்கையை வாழ்கிறோம். இவ்வாறான சுயநல வாழ்வை நாம் வாழ்வதால் நமக்கும் பயனில்லை பிறர்க்கும் பயனில்லை. நாம் இருக்கையில் நம்மைப் பலரும் போற்ற வேண்டும், இறந்த பின்னரும் நம்மை நினைத்து மகிழ வேண்டும். அப்பொழுது தான் நாம் வாழ்ந்த வாழ்க்கைக்கு ஒரு அர்த்தம் உண்டாகும்.

அதற்கு ஓரே வழி பொதுநலவாதிகள் உருவாக்கிய இயக்கத்தில் இணைந்து சேவை புரிவதேயாகும். அவ்வாறு நாம் பொதுநலத்தைப் பேணும் மார்க்கத்தில் செல்வோமெனில் நம்மை அனைவரும் போற்றி வணங்குவர் என்பதில் ஐயமில்லை. அனைவரிடமும் நாம் அன்பு செலுத்துகையில் அனைவரும் நம் மேல் பன்மடங்கு அன்பு செலுத்துவர்.

அன்பு தான் இன்ப ஊற்று
அன்பு தான் உலக ஜோதி
அன்பு தான் உலக மகா சக்தி!

அன்பு நடமாடும் கலைக்கூடமே

திரைப்படம்: அவன் தான் மனிதன்
இயற்றியவர்: கவிஞர் கண்ணதாசன்
இசை: எம்.எஸ். விஸ்வநாதன்
பாடியவர்: பி. சுசீலா, டி.எம். சௌந்தரராஜன்

அன்பு நடமாடும் கலைக்கூடமே ஆசை மழைமேகமே
கண்ணில் விளையாடும் எழில் வண்ணமே கன்னித் தமிழ் மன்றமே
அன்பு நடமாடும் கலைக்கூடமே ஆசை மழைமேகமே
கண்ணில் விளையாடும் எழில் வண்ணமே கன்னித் தமிழ் மன்றமே

மாதவிக் கொடிப்பூவின் இதழோரமே மயக்கும் மதுச்சாரமே
மாதவிக் கொடிப்பூவின் இதழோரமே மயக்கும் மதுச்சாரமே
மஞ்சள் வெயில் போலும் மலர் வண்ண முகமே மன்னர் குலத் தங்கமே
பச்சை மலைத்தோட்ட மணியாரமே பாடும் புது ராகமே

அன்பு நடமாடும் கலைக்கூடமே ஆசை மழைமேகமே
கண்ணில் விளையாடும் எழில் வண்ணமே கன்னித் தமிழ் மன்றமே

வெள்ளலை கடலாடும் பொன்னாடமே விளக்கின் ஒளிவெள்ளமே
வெள்ளலை கடலாடும் பொன்னாடமே விளக்கின் ஒளிவெள்ளமே
செல்லும் இடந்தோறும் புகழ் சேர்க்கும் தவமே சென்னல் குலமன்னனே
இன்று கவிபாடும் என் செல்வமே என்றும் என் தெய்வமே

மாநிலம் எல்லாமும் நம் இல்லமே மக்கள் நம் சொந்தமே
காணும் நிலமெங்கும் தமிழ் பாடும் மனமே உலகம் நமதாகுமே
அன்று கவிவேந்தன் சொல் வண்ணமே யாவும் உறவாகுமே

அன்பு நடமாடும் கலைக்கூடமே ஆசை மழைமேகமே
கண்ணில் விளையாடும் எழில் வண்ணமே கன்னித் தமிழ் மன்றமே

நமது வெற்றியை நாளை சரித்திரம் சொல்லலும்

ஒரு நாடு முழுவதும் நலமாக இருந்தால் மட்டுமே அதன் குடிமக்கள் ஒவ்வொருவரும் நலமாக வாழ முடியும். நாட்டில் பஞ்சம் தலைவிரித்தாடினால் மக்கள் அனைவரும் அவதிக்குள்ளாவர். ஒரு நாட்டில் செல்வம் பெருகி மக்கள் நலமாய் வாழ வழிவகுக்க வேண்டியது அரசாங்கத்தின் இன்றியமையாத கடமை. ஜனநாயக நாடான நமது இந்தியாவில் அரசாங்கத்தின் ஒவ்வொரு அமைச்சரையும் தேர்ந்தெடுப்பது நாட்டு மக்களே என்பதால் அவர்கள் தகுதியுள்ளவர்களை மட்டுமே தேர்ந்தெடுப்பது அவசியம். அத்துடன் அவ்வாறு தம்மால் தேர்ந்தெடுக்கப் படக் கோரி வாக்குக் கேட்டு ஒவ்வொரு வேட்பாளரும் மக்களை அணுகுகையில் மக்கள் தம் தொகுதிகளில் நிலவும் பிரச்சினைகளை அவ்வேட்பாளர் தீர்க்கப் பாடுபடுவார் எனும் உத்தரவாதத்தை அவரிடமிருந்து பெற வேண்டும்.

இதற்கு முதலில் ஒவ்வொரு தொகுதி மக்களும் தம் தொகுதியில் நிலவும் பிரச்சினைகள் அனைத்தையும் மிகத் தெளிவாக அறிந்திருத்தல் அவசியமாகிறது. அப்பிரச்சினைகள் குறித்த விவரங்களை வேட்பாளரும் தெளிவாக அறிந்திருத்தல் அவசியமே. இதுகாலம் வரை இத்தகைய தெளிவு இரு தரப்பிலும் இருந்ததில்லை என்பதால் தேர்தல் முடிந்த பின்னர் பதவிக்கு வரும் வேட்பாளர்கள் முறையாக சேவை செய்யாமல் மக்களை ஏமாற்றித் தம் சுயநலம் பேணுவதே நடைமுறையாக இருந்து வந்துள்ளது. கடந்த ஐந்து ஆண்டுகளில் நமது நாட்டின் பல்வேறு துறைகளிலும் பெரும்பாலும் ஊழலே மலிந்து மக்கள் அரசாங்கத்தாலேயே கொள்ளையடிக்கப்பட்டு வந்துள்ளனர் எனும் கசப்பான உண்மை இந்திய தணிக்கைத் துறையின் அறிக்கைகள் வாயிலாக வெட்ட வெளிச்சமானதாலும் தகவல் பெரும் உரிமைச் சட்டத்தின் மூலமும் ஊடகங்களின் ஊக்கமிக்க செயல்பாட்டினாலும் ஊழல் செய்தவர் யார் யார் என்பதை மக்கள் தெள்ளத் தெளிவாக அறிந்து கொள்ளும் வாய்ப்புக் கிடைத்தது.

அரசாங்கத்தில் முக்கியப் பதவிகள் வகிப்பவர்களின் ஊழலினால் பெரிதும் பாதிக்கப்பட்டு மக்கள் வறுமையில் வாடி உள்ளம் குமுறும் நிலை சற்றும் மாறாமல் நீடித்திருக்க, குற்றம் புரிந்த பலரும் குற்றம் வெளிவந்த பின்னர் வெகு காலமாகிய பின்னரும் அதற்குரிய தண்டனை பெறுவதோ மக்களிடமிருந்து களவாடப் பட்ட பெரும் தொகை திரும்பவும் மக்கள் நலனுக்காக செலவிடப் படுவதோ இவற்றுள் எதுவும் நிறைவேறாமல் குற்றவாளிகள் தொடர்ந்து பதவிகளில் ஒட்டிக்கொண்டிருப்பதும், குற்றவாளிகளுள் சிறையில் அடைக்கப்பட்ட ஒரு சிலர் மீது நடைபெறும் வழக்குகள் ஆமை வேகத்தில் நகர்ந்து கொண்டிருப்பதும் மக்களின் பொறுமையைப் பெரிதும் சோதிப்பதாக உள்ளது.

இந்த நிலையில் தமிழ்நாட்டில் மாநகராட்சிகளுக்கும், நகராட்சிகள் மற்றும் ஊராட்சிகளுக்கும் தேர்தல் விரைவில் அறிவிக்கப்பட உள்ளது. இதுகாலம் வரை இல்லாதிருந்த ஒரு விழிப்புணர்வை மக்களுக்கு ஏற்படுத்த வேண்டும் எனும் உன்னத நோக்குடன் சென்னையைச் சேர்ந்த மாணவர்கள் பலர் ஒன்று கூடி சென்னையில் மக்களை தினம் பாதிக்கும் பல்வேறு குறைபாடுகளை முறையாகக் கணக்கிட்டு மக்கள் யாவரும் அறியும் வண்ணம் வெளியிடும் முயற்சியில் இறங்கியுள்ளனர். சாலைகளின் தரம் மற்றும் குறைபாடுகள், பொதுக்கழிப்பிடங்களின் நிலை, ஏழை மக்களின் வாழ்க்கை நிலவரம் உள்ளிட்ட அனைத்து விவரங்களையும் தேவையான இடங்களில் வீடியோ பதிவு செய்தும், தேவையான விவரங்களைத் திரட்டியும் http://www.transparentchennai.com/ எனும் இணையதளத்தை அமைத்து அதில் பதிவு செய்து அதன் மூலம் அரசின் செயல்பாட்டை மதிப்பீடு செய்யவும் தேர்தலில் நிற்கும் வேட்பாளர்களைக் கட்டுப்படுத்தவும், அவர்களது செயல்பாட்டை மதிப்பிடவும் என மக்களுக்கு உதவும் மாபெரும் தொண்டில் இறங்கியுள்ளனர்.

நாட்டிலுள்ள அனைவருக்கும் முன்னோடிகளாக உருவெடுத்துள்ள இவ்விளைஞர்களின் பணி பாராட்டத்தக்கது மட்டுமின்றி நாட்டின் அனைத்து மாவட்டங்களிலும் ஊர்களிலும் உள்ள யாவரும் பின்பற்ற வேண்டிய ஒன்றாகும். காந்தியவாதி அன்னா தலைமையில் மக்கள் பெருந்திரளாக ஊழலுக்கு எதிரே போராடும் சூழலுடன் இத்தகைய குறைகள் கண்டறியப்பட்டு நிவர்த்தி பெற எடுக்கப்படும் இயக்கங்களும் நாடெங்கிலும் பல்கிப் பெருகி ஊழல் புரிய எண்ணுவோர் அஞ்சி நடுங்கித் திருந்தும் கட்டாய நிலை விரைவில் ஏற்பட வழி கிடைத்துள்ளது.

"காற்றுள்ள போதே தூற்றிக்கொள்" எனும் பொன்மொழிக்கிணங்க இந்த ஆரோக்யமான சூழலைப் பயன்படுத்தி மக்கள் யாவரும் ஒன்று கூடிப் போராடினால் நாட்டில் அநீதிகள் குறைந்து நீதி நிலைபெற வழி பிறக்கும் என்பதில் எள்ளளவும் ஐயமில்லை. மக்கள் நலனைக் கருத்தில் கொண்டு அமைந்த இப்படை வெல்வதுறுதி.

நமது வெற்றியை நாளை சரித்திரம் சொல்லலும்

திரைப்படம்: உலகம் சுற்றும் வாலிபன்
இயற்றியவர்: புலவர் வேதா
இசை: எம்.எஸ். விஸ்வநாதன்
பாடியவர்: சீர்காழி கோவிந்தராஜன்
ஆண்டு: 1973

நமது வெற்றியை நாளை சரித்திரம் சொல்லலும்
இப்படை தோற்கின் எப்படை வெல்லும்?

நீதிக்கு இது ஒரு போராட்டம் - இதை
நிச்சயம் உலகம் பாராட்டும்

ஆஆ ஆஆ ஆஆ ஆஆ ஆஆஆஆஆஆஆஆஆ

வல்லோர்கள் சுரண்டும் பொல்லாத கொடுமை
இல்லாமல் மாறும் ஒரு தேதி

ஆஆஆஆஆஆஆஆஆ ஆஆஆஆஆஆஆஆஆ

வல்லோர்கள் சுரண்டும் பொல்லாத கொடுமை
இல்லாமல் மாறும் ஒரு தேதி - அன்று
இல்லாமை நீங்கி எல்லோரும் வாழ
இந்நாட்டில் மலரும் சமநீதி

நம்மை ஏய்ப்பவர் கையில் அதிகாரம்
இருந்திடும் என்னும் கதை மாறும்
நம்மை ஏய்ப்பவர் கையில் அதிகாரம்
இருந்திடும் என்னும் கதை மாறும்

ஆற்றலும் அறிவும் நன்மைகள் ஓங்க
இயற்கை தந்த பரிசாகும் - இதில்
நாட்டினைக் கெடுத்து நன்மையை அழிக்க
நினைத்தால் எவர்க்கும் அழிவாகும்

நல்லதை வளர்ப்பது அறிவாற்றல்
அல்லதை நினைப்பது அழிவாற்றல்

நமது வெற்றியை நாளை சரித்திரம் சொல்லலும்
இப்படை தோற்கின் எப்படை வெல்லும்?
நமது வெற்றியை நாளை சரித்திரம் சொல்லலும்
இப்படை தோற்கின் எப்படை வெல்லும்?

ஜகம் புகழும் புண்ய கதை

நாட்டு மக்கள் எல்லோரும் எல்லா நலமும் பெற்று நல்வாழ்வு வாழ்ந்தது ராமராஜ்யம் என்ற கருத்து தொன்றுதொட்டு நிலவுகிறது. ராமாயண காவிய நாயகன் ஸ்ரீ ராமனை அக்காவியத்தை இயற்றிய வால்மீகி ஒரு உன்னத குணம் நிரம்பிய, தந்தை தாய் சொற்படி நடந்த, தன்னை நம்பியவர்களைக் காத்த, அனைவரையும் சகோதரர்களாக பாவித்த, தன் மனைவியைத் தவிர வேறொரு பெண்ணை மனதாலும் நினையாத உத்தம புருஷனாக மட்டுமே விவரித்திருக்கிறார். பிற்காலத்தில் வந்த மனிதர்கள் ராமாயணத்தைத் தொடர்ந்து படித்துப் பிறருக்குச் சொல்கையில் ஸ்ரீ ராமனின் குணங்களையும் பெருமையையும் போற்றி அவனை ஒரு அவதாரமாக உருவாக்கிவிட்டனர்.

ராமாயணத்தில் ஸ்ரீ ராமனின் நற்குணங்கள் பல்வேறு சந்தர்ப்பங்களில் தெளிவாக விளக்கப்பட்டுள்ளன. சிறு வயது முதலே ராமன் தனது மூன்று சகோதரர்களிடத்திலும் அளவிடற்கரிய அன்பு கொண்டவனாகவும் அவர்கள் யாவரும் போற்றி வணங்கத் தக்க அறிவும் பொறுமையும் வீரமும் கொண்ட பெருந்தகையாகவும் விளங்கினான். தன்னைப் பெற்ற தாயான கௌசல்யா மட்டுமின்றி தன் சிற்றன்னையரான கைகேயி, சுமத்திரை ஆகியோரையும் சமமான பிரியத்துடனும் மரியாதையுடனும் நடத்தினான் ஸ்ரீராமன்.

கைகேயி தசரதனிடம் வரம் பெற்று அவற்றின் படி பரதன் நாட்டை ஆளவும் ராமன் பதினான்காண்டுகள் வனவாசம் செய்யவும் பணிக்கையில் அவளது ஆணையைத் தன் தந்தையின் ஆணையாகவே ஏற்றதுடன் தனது தம்பியான பரதன் நாடாள அமைந்தது குறித்து எவ்விதப் போறாமையும் கொள்ளாது தனக்கு அரசபதவி கிடைத்தால் அடையும் மகிழ்ச்சியை விடவும் அதிகமான மகிழ்ச்சியை வெளிப்படுத்தினான்.

மன்னவன் பணியன்றாகின் நும் பணி மறப்பனோ என்
பின்னவன் பெற்ற செல்வம் அடியனேன் பெற்றதன்றோ!

என உரைத்து மகிழ்ச்சியுடன் வனவாசம் மேற்கொள்கிறான். கோபாவேசம் கொண்டு கொதித்தெழுந்த இலக்குவனை அமைதிப் படுத்தி அவனையும் உடன் அழைத்துச் சென்றான். வன வேடனான குகனையும், வானரனான சுக்ரீவனையும், அரக்கனான விபீஷணனையும் அவர்களது குலம் இனம் முதலியவற்றைப பற்றி சற்றும் பொருட்படுத்தாது தன் சகோதரர்களாக ஏற்றான். சீதையை இராவணன் கவர்ந்து செல்கையில் அவனுடன் போராடி உயிர் துறக்கும் நிலையில் இருந்த கழுகான ஜடாயுவைப் போற்றி வணங்கி ஜடாயு இறந்ததும் அப்பறவையைத் தன் தந்தையாகவே பாவித்து ஈமச் சடங்குகளைச் செய்தான். சுக்ரீவனுக்கு அடைக்கலம் கொடுத்தவுடன் தனது வாக்குறுதியைக் காக்கத் தனக்கு அவப்பெயர் நேர்வதைப் பற்றியும் கவலை கொள்ளாது அக்கிரமமாய் நடந்த வாலியை மறைந்திருந்து கொன்றான்.

இராவணனின் சகோதரர்கள், புதல்வர்கள், படைத்தலைவர்கள் யாவரையும் வென்று அழித்த பின்னர் இராவணன் தன்னந்தனியாகத் தன்னுடன் போர் செய்து தோற்ற பொழுது அவனுக்கு மேலும் போராட ஒரு சந்தர்ப்பததைத் தர விழைந்து, "இன்று போய் நாளை வா" என்று யுத்தத்திலும் உயர்ந்த தரும நெறியைக் கடைபிடித்தான்.

இன்று நம் நாட்டில் நடக்கும் ஆட்சியை எண்ணிப் பார்க்கையில் மனம் மிக நோகிறது. மக்களைக் காக்க வேண்டிய அரசாங்கம் மக்களைச் சுரண்டுகிறது. காவல் துறை குற்றவாளிகளைக் கண்டறிந்து தண்டித்து அவர்களிடமிருந்து மக்களைப் பாதுகாப்பதற்குப் பதில் குற்றவாளிகளுடன் கூட்டுச் சேர்ந்து கொண்டு செயல்படுகையில் தீவிரவாதிகளால் மக்கள் தாக்கப்பட்டு தங்கள் இன்னுயிரை இழக்கின்றனர். காவல் துறையினரை முறையாக மக்களைக் காக்கும் பணியில் ஈடுபடுத்தி அவர்களுக்குத் தகுந்த சாதனைகளையும் தக்க அதிகாரங்களையும் வழங்காமல் அவர்களை மந்திரிமார்கள் வீட்டைக் காவல் காக்கவும் அவர்கள் வெளிக்குப் போகையில் விளக்குப் பிடிக்கவும் உபயோகப்படுத்தி காவல் துறையினருக்குரிய மரியாதையைக் கெடுத்து நாட்டைக் கெடுக்கும் அமைச்சர்கள் அடங்கிய அரசாங்கம் மக்களைக் காக்க எவ்வித முயற்சியும் செய்யாது தவிக்க விடுகிறது.

இந்த இழிநிலை மாறி மீண்டும் ராமராஜ்யம் வரவேண்டுமெனும் பேரவாவில் ஸ்ரீராமனின் புண்யகதையை எடுத்துரைக்கும் பாடல் இன்றைய பாடலாக மலர்கிறது.

ஜகம் புகழும் புண்ய கதை

திரைப்படம்: லவகுசா
பாடலாசிரியர்: ஏ. மருதகாசி
இசை: கே.வி. மஹாதேவன்
பாடியவர்: பி. சுசீலா, பி. லீலா
ஆண்டு: 1963

ஜகம் புகழும் புண்ய கதை இராமனின் கதையே உங்கள்
செவி குளிரப் பாடிடுவோம் கேளுங்கள் இதையே
ஜகம் புகழும் புண்ய கதை இராமனின் கதையே

ஆஆஆ ஆஆஆஆஆ ஆஆஆஆ ஆஆஆஆஆஆ
ஆஆஆஆஆஆஆ ஆஆஆஆ ஆஆஆஆ ஆஆஆஆ ஆஆஆஆ

இகபர சுகமெலாம் அடைந்திடலாமே
இந்தக் கதை கேட்கும் எல்லோருமே
இனிக்குது நாவெல்லாம் உரைத்திடும் போதிலே
இனிக்குது நாவெல்லாம் உரைத்திடும் போதிலே
இணையே இல்லாத காவியமாகும்

ஜகம் புகழும் புண்ய கதை இராமனின் கதையே உங்கள்
செவி குளிரப் பாடிடுவோம் கேளுங்கள் இதையே

அயோத்தி மன்னன் தசரதனின் அருந்தவத்தால்
அவன் மனைவி கௌசல்யா கைகேயி சுமித்திரை
கருவினிலே உருவானார் இராம லக்ஷ்மணர்
கனிவுள்ள பரதன் சத்ருக்னர் நால்வன்

ஆஆஆ ஆஆஆஆஆ ஆஆஆஆஆ

நாட்டினர் போற்றவே நால்வரும் பலகலை
ஆற்றலும் அடைய மன்னன் வளர்த்து வந்தானே
காட்டினில் கௌசிகன் யாகத்தைக் காக்கவே
கண்மணி ராமலக்ஷ்மணரை அனுப்பினனே
கண்மணி ராமலக்ஷ்மணரை அனுப்பினனே
தாடகை சுபாஹுவை தரையினில் வீழ்த்தியே
தவசிகள் யாகம் காத்து ஆசி கொண்டனரே
தாடகை சுபாஹுவை தரையினில் வீழ்த்தியே
தவசிகள் யாகம் காத்து ஆசி கொண்டனரே
பாதையில் அகலிகை சாபத்தைத் தீர்த்தபின்
பாதையில் அகலிகை சாபத்தைத் தீர்த்தபின்
சீர்பெரும் மிதிலை நகர் நாடிச் சென்றனரே

வீதியில் சென்றிடும் போதிலே ராமன்
சீதையைக் கன்னிமாட மீதிலே கண்டான்
காதலினால் இருவர் கண்களும் கலந்தன
காதலினால் இருவர் கண்களும் கலந்தன
கன்னியை வில்லொடித்து சொந்தமும் கொண்டான்
ஆணவத்தால் அறிவிழந்த பரசுராமன்
அகந்தைதனை அடக்கி ராமன் வெற்றி கொண்டான்
அரும் புதல்வன் வீரத்தைக் கண்ட மன்னன்
அளவில்லா ஆனந்த நிலையைக் கண்டான்

ஜகம் புகழும் புண்ய கதை இராமனின் கதையே உங்கள்
செவி குளிரப் பாடிடுவோம் கேளுங்கள் இதையே
ஜகம் புகழும் புண்ய கதை இராமனின் கதையே உங்கள்
செவி குளிரப் பாடிடுவோம் கேளுங்கள் இதையே
ஜகம் புகழும் புண்ய கதை இராமனின் கதையே

மன்னவன் தசரதன் கண்மணி ராமனுக்கு
மணிமுடி சூட்டவே நாள் குறித்தானே

ஆஆஆஆஆ ஆஆஆ ஆஆஆ ஆஆ ஆஆஆஆஆஆ
ஆஆஆஆஆஆஆஆஆஆஆ

மன்னவன் தசரதன் கண்மணி ராமனுக்கு
மணிமுடி சூட்டவே நாள் குறித்தானே
மக்கள் யாவரும் மகிழ்வுடன் நகரையே
மகர தோரணத்தால் அலங்கரித்தாரே
மந்தரை போதனையால் மனம் மாறிக் கைகேயி
மணிமுடி பரதன் சூடி நாட்டை ஆளவும்
வனத்தில் ராமன் பதினான்கண்டுகள்
வாழவும் மன்னனிடம் வரமது கேட்டாள்

அந்த சொல்லைக் கேட்ட மன்னர்
மரண மூர்ச்சை அடைந்த பின்னர்
ராமனையும் அழைக்கச் செய்தாள்
தந்தையுனை வனம் போகச் சொல்லி
தம்பி பரதனுக்கு மகுடத்தைத் தந்தார் என்றாள்
சஞ்சலமில்லாமல் அஞ்சலவண்ணனும்
சம்மதம் தாயே என வணங்கிச் சென்றான்
விஞ்சிய கோபத்தால் வெகுண்டே வில்லெடுத்த
தம்பி இலக்குவனை சாந்தமாக்கினான்

இளையவனும் ஜானகியும் நிழல் போல் தொடரவே
மரவுறி தரித்து ராமன் செல்வது கண்டு
இளையவனும் ஜானகியும் நிழல் போல் தொடரவே
மரவுறி தரித்து ராமன் செல்வது கண்டு
கலங்கி நாட்டு மக்கள் கண்ணீர் சிந்தியே

ஆஆஆஆ ஆஆஆஆ ஆஆஆஆஆஆ ஆஆஆஆ

கலங்கி நாட்டு மக்கள் கண்ணீர் சிந்தியே
இதயங்கள் போவதென்று தடுத்தனர் சென்றே

ஆறுதல் கூறியே கார்முகில் வண்ணன்
அன்புடன் அவர்களிடம் விடையும் கொண்டானே
அன்னையும் தந்தையும் சொன்ன சொல் காக்கவே
அண்ணலும் கானகத்தை நாடிச் சென்றானே

ஜகம் புகழும் புண்ய கதை இராமனின் கதையே உங்கள்
செவி குளிரப் பாடிடுவோம் கேளுங்கள் இதையே
ஜகம் புகழும் புண்ய கதை இராமனின் கதையே

ஜகம் புகழும் புண்ய கதை இராமனின் கதையே உங்கள்
செவி குளிரப் பாடிடுவோம் கேளுங்கள் இதையே
ஜகம் புகழும் புண்ய கதை இராமனின் கதையே உங்கள்
செவி குளிரப் பாடிடுவோம் கேளுங்கள் இதையே
ஜகம் புகழும் புண்ய கதை இராமனின் கதையே

கங்கைக் கரை அதிபன் பண்பில் உயர்ந்த குகன்
அன்பால் ராமபிரான் நண்பனாகினான்
கங்கைக் கரை அதிபன் பண்பில் உயர்ந்த குகன்
அன்பால் ராமபிரான் நண்பனாகினான்
பஞ்சவடி செல்லும் பாதையைக் காட்டினான்
பஞ்சவடி செல்லும் பாதையைக் காட்டினான்
அஞ்சனவண்ணன் அங்கு சென்று தங்கினான்
அஞ்சனவண்ணன் அங்கு சென்று தங்கினான்

ராவணனின் தங்கை கொடியவள் சூர்ப்பனகை
ராமபிரான் மீது மையல் கொண்டாள்
ராவணனின் தங்கை கொடியவள் சூர்ப்பனகை
ராமபிரான் மீது மையல் கொண்டாள்
கோபம் கொண்ட இளையோன் கூரம்பால் அவளை
மானபங்கம் செய்து விரட்டி விட்டான்
தங்கையின் போதையால் தசகண்ட ராவணன்
ஜானகி தேவியை சிறையெடுத்தான்
தங்கையின் போதையால் தசகண்ட ராவணன்
ஜானகி தேவியை சிறையெடுத்தான்
நெஞ்சம் கனலாகி கண்கள் குளமாகி
தம்பியுடன் தேவியைத் தேடிச்சென்றான்
ராமன் தேடிச் சென்றான்

வழியிலே ஜாடாயுவால் விவரமெல்லாம் அறிந்தான்
வாயு மைந்தன் அனுமானின் நட்பைக் கொண்டான்
ஆழியைத் தாண்டியே இலங்கை சென்ற அனுமான்
அன்னையை அசோகவனத்தில் கண்டான்

ஆஆஆஆஆஆ ஆஆஆஆஆஆஆஆஆஆ

ராமசாமியின் தூதன் நானடா ராவணா என்றான்
ராமசாமியின் தூதன் நானடா ராவணா என்றான் அனுமான்
லங்காபுரியைத் தீக்கிரையாக்கி கிஷ்கிந்தை சென்றான்
கண்டேன் அன்னையை என்றே ராமனை சேவித்தே நின்றான்
கடலைக் கடந்து அண்ணல் வானர சேனையுடன் சென்றான்
வானர சேனையுடன் சென்றான்
விபீஷணனின் நட்பைக் கொண்டான் ராவணனை வென்றான்
வீரமாதா ஜானகி தேவியைத் தீக்குளிக்கச் செய்தான்

ஆஆஆஆஆஆஆ ஆஆஆஆஆஆஆ ஆஆஆஆஆஆஆ

கற்பின் கனலைக் கனிவுடன் ஏற்று அயோத்தி நகர் மீண்டான்
கற்பின் கனலைக் கனிவுடன் ஏற்று அயோத்தி நகர் மீண்டான்
கலங்கிய மக்கள் களிப்புற ராமன் அரசுரிமை கொண்டான்
அரசுரிமை கொண்டான்
ஆஆஆ ஆஆஆ ஆஆஆ ஆஆஆ ஆஆஆஆஆஆ ஆஆஆஆஆஆ

ஜகம் புகழும் புண்ய கதை இராமனின் கதையே உங்கள்
செவி குளிரப் பாடிடுவோம் கேளுங்கள் இதையே
ஜகம் புகழும் புண்ய கதை இராமனின் கதையே

ஸ்ரீ ராகவம் தசரதாத்மஜம் அப்ரமேயம்
சீதாபதிம் ரகுகுலான்மயரக்ஷமீயம்
ஆஜானுபாகும் அரவிந்த தளாய தாட்ச்ம்
ராமம் நிசாசர விநாசகரம் நமாமி

ஒன்று எங்கள் ஜாதியே

இன்று இந்தியர்கள் அனைவருக்கும் ஒரு திருநாள். ஆட்சியாளர்களும், அதிகாரிகளும் எவ்வித முறைகேடுகளில் ஈடுபட்டாலும் அவர்களைத் தட்டிக்கேட்க அஞ்சிய காலம் முடிந்து மக்கள் சக்திக்கு ஆட்சியாளர்கள் அனைவரும் தலைவணங்கும் காலம் வந்துள்ளது.

ஊழல் துயர்க்கடல் நீந்துவர் நீந்தார்
அன்னாவடி சேரா தார்

ஆங்கிலேய ஆட்சிக்கு எதிராக மஹாத்மா காந்தியடிகளின் தலைமையில் எண்ணிறந்த தியாகிகள் ஒன்று கூடிப் போராடிப் பெற்றுத் தந்த சுதந்திரத்தை சிறிது சிறிதாக உள்நாட்டுப் புல்லுருவிகள் பன்னாட்டு நிறுவனங்களுக்கு விற்று, இந்திய மக்களை வறுமையில் வாடவிட்டுத் தாம் மட்டும் பெரும் பணக்காரர்களாக உலாவிவரும் ஊழல் மலிந்த அராஜக ஆட்சியால் வாடி, அனுதினமும் துயரக்கடலில் முழ்கிக் கரையேற வழி தெரியாமல் தத்தளித்த இந்திய மக்களுக்கு அத்துயரக்கடலிலிருந்து மீண்டு கரை சேர உறுதுணையாக வந்த தோணியாக வந்துதித்தார் அன்னா ஹசாரே எனும் காந்தியவாதி.

தாங்கள் செய்யும் ஊழல் குற்றங்களைச் சுட்டிக்காட்டுபவர்களின் மீது எவ்வாறேனும் பழிசுமத்தி, "நாங்கள் செய்யும் ஊழலைச் சுட்டிக்காட்ட உனக்கு அருகதையில்லை" எனும் ரீதியில் பிரச்சாரம் செய்து அடாவடியாகத் தொடர்ந்து ஊழலிலேயே ஈடுபட்டிருக்கும் அரசியல்வாதிகள் பலரும் இன்று பெட்டிப்பாம்மாக அடங்கி விட்டனர். இத்தகைய மாற்றத்திற்குக் காரணம் அன்னா ஹசாரே அவர்களின் தவமும் தியாகமுமே ஆகும். ஆயுள் முழுதும் பிரம்மச்சரிய விரதம் பூண்டு திருமணம் செய்து கொள்ளாது துறவு வாழ்க்கை வாழ்ந்து வரும் இம்மஹானின் தவ வலிமை தெரியாது அவர் மீது அவதூறு பிரச்சாரம் மேற்கொண்டவர்கள் கண்காணாத இடத்திற்கு ஓடி ஒளிந்து கொண்டனர். பன்னிரண்டு நாட்கள் தொடர்ந்து உண்ணாவிரதமிருந்த அன்னாவின் போராட்டத்துக்கு இந்திய அரசு தலைவணங்கி அவரது மூன்று கோரிக்கைகளான அனைத்துக் கீழ்மட்ட அரசு அதிகாரிகளையும் லோக்பால் அமைப்பின் கீழ் கொண்டு வருவது, அனைத்து மாநிலங்களிலும் லோகாயுத்தா அமைப்பை ஏற்படுத்துவது, பொது மக்கள் அரசுத்துறை அலுவலகங்களின் உதவியைப் பல்வேறு காரணங்களுக்காக அணுகுகையில் அவர்களுக்கு உரிய சேவையை ஊர்ஜிதம் செய்யவல்ல சிட்டிஜன்ஸ் சார்டர் அமைப்பது ஆகியவற்றை நிறைவேற்றுவதாகப் பாரளுமன்றத்தில் தீர்மானம் நிறைவேற்றியதை அடுத்து இன்று அவர் தன் உண்ணாவிரதத்தை முடித்துக் கொள்கிறார்.

அன்னாவின் தலைமையை ஏற்று அவரது உண்ணாவிரத்துக்கு ஆதரவாக டில்லி ராம்லீலா மைதானத்திலும் பிற பல ஊர்களிலும் உள்ள மக்கள் பலர் இளைஞர்கள், முதியவர் என்ற பாகுபாடின்றித் தாங்களும் உண்ணாவிரதம் மேற்கொண்டனர். இந்த அறப்போராட்டத்தில் பங்குபெற லட்சக்கணக்கில் அலைகடலெனத் திரண்ட மக்கள் கூட்டம் யாரும் காசுகொடுத்துக் கூட்டிவந்த கூட்டமல்ல. அன்பால் தானாக சேர்ந்த கூட்டம். இவர்களுக்கு ஆதரவாகப் பல பொதுநலத்தொண்டர்கள் திரண்டு அனைவருக்கும் உணவு, குடிநீர், அவசர மருத்துவ உதவி ஆகியவற்றை வழங்கிவருகின்றனர். மேலும் பல தொண்டர்கள் போராட்டத்தில் பங்குகொண்டு நாட்டு மக்கள் அனைவருக்கும் விழிப்புணர்வு ஏற்படுத்தும் சேவையைப் பல்வேறு ஊடகங்கள் வாயிலாக மேற்கொண்டு வருகின்றனர்.

இந்திய வரலாற்றில் முதன்முறையாக மக்கள் சக்தியை உணர்ந்து அவர்கள் மனதுக்கிசைவான வகையில் ஊழல் எனும் கொடிய அரக்கனால் ஏற்பட்ட அவர்களது குறைகள் தீர்க்கப் படுவதின் அவசியத்தை அரசியல்வாதிகள் பலரும் உணர்ந்து பாராளுமன்றத்தில் தங்களது ஜனநாயகக் கடமைகளை நிறைவேற்றியுள்ளனர். ஊழலில்லாத நல்லாட்சி நாட்டில் நிலவிடச் செய்வதில் முதல் கட்டம் அரசியல்வாதிகளல்லாத, தேர்தல்களில் வெற்றிபெறாத சாமான்ய மக்களின் தலைவரான அன்னாவின் ஆணையின் பேரில் நிறைவேறியுள்ளது. சட்டங்கள் இயற்றுவது தேர்தலில் வெற்றிபெற்று ஆட்சிக்கு வருபவர்களின் ஏகபோக உரிமையாக விளங்குவதும் அவர்களைத் தேர்த்லில் தேர்ந்தெடுத்து ஆட்சி பீடத்தில் அமர்த்தி வைக்கும் மக்களது உரிமை ஐந்தாண்டுகளுக்கு ஒரு முறை தேர்தலில் வக்களிப்பது ஒன்றே என்பதும் இனி நட்வாது. மக்கள் பிரதிநிதிகள் இனிமேல் மக்கள் விரோத சட்டங்கள் ஏதும் இயற்ற முடியாது. மக்கள் பிரதிநிதிகள் மக்களின் சேவகர்களே, மக்களே எஜமானர்கள் எனும் உண்மையை யாவரும் உணரவைத்தது இன்றைய மக்களின் ஒருங்கிணைந்த அறவழிப் போராட்டம்.

தேர்தலில் மட்டுமல்லாது தேர்தல் முடிந்து அமையும் ஆட்சியின் போதும் அரசு முறையாக நடக்காவிடில் அந்த அரசை அகற்றி வேறு அரசை அமைக்கும் வலிமை மக்களிடம் உள்ளது எனும் உண்மையை உலகறிய எடுத்துக் காட்டிய வரலாற்றினைப் படைத்தது இன்றைய நாள்.

ஊழலுக்கு எதிராகப் போராட ஒரு வலுவான அமைப்பு உருவாகிவிட்டது. இவ்வமைப்பை பிரபல பொதுநலத் தொண்டர்கள் பலருடன் பல்வேறு தலைவர்கள், திரைத் துறையினர் மற்றும் பல்லாயிரக்கணக்கான இளைஞர்கள் ஒன்று சேர்ந்து மிகவும் வலுவான ஒரு இயக்கமாக உருவாக்கியுள்ளனர். இது ஒரு தேசபக்தர்கள் பேரியக்கம். நம் இந்தியத் தாய்த் திருநாடு உலகம் வியந்து நோக்கும் வல்லரசாக உருவாக்கவென்றே உருவான இயக்கம். இனி என்றும் சீனாக் காரர்களும் சிங்களவர்களும் இந்தியர்களை ஏளனமாக எண்ணிக் கொடுமைப்படுத்த இயலாது. ஊழல் ஒழிந்து இந்திய நாடு எல்லாத் துறைகளிலும் முன்னணியில் விளங்கும் நாள் வெகு தொலைவில் இல்லை. இனி படித்த திறமைவாய்ந்த இளைஞர்கள் யாரும் வேலை தேடி அந்நிய நாடுகளுக்குக் செல்ல வேண்டியதில்லை. இந்திய மண்ணின் இயற்கை வளங்களை சுரங்கங்களின் வழியே சுரண்டிக் கள்ளத்தனமாக அயல்நாடுகளுக்குக் கடத்தி யாரும் பெரும் செல்வந்தர்களாவது இனி நடவாது.

மக்களுக்கு உண்மையான சேவை புரியும் தலைவர்கள் மட்டுமே இனி பதவிகளைப் பெற முடியும். காசு பணம் செலவழித்துத் தேர்தலில் வெற்றிபெற்று நாடடைச் சுரண்டும் திட்டம் இனி நிறைவேறாது. உழைப்பவர் மட்டுமே வாழ்வில் உயர இயலும். திருடர்கள் சிறையில் மட்டுமே வாழ இயலும். இனி ஜாதியின் பெயரால் மக்களைப் பிரித்தாளும் சூழ்ச்சி பலிக்காது ஏனெனில் இனி இந்தியர்கள் அனைவரும் ஓரே ஜாதி.

நானும் அன்னா, நீயும் அன்னா நம்
நாட்டு மக்கள் அனைவரும் அன்னா

ஒன்று எங்கள் ஜாதியே

திரைப்படம்: பணக்காரக் குடும்பம்
இயற்றியவர்: கவிஞர் கண்ணதாசன்
இசை: எம்.எஸ். விஸ்வநாதன், டி.கே. ராமமூர்த்தி
பாடியோர்: டி.எம். சௌந்தரராஜன், எல்.ஆர். ஈஸ்வரி
aandu: 1964

அஹா ஆஆஆஆஆஆஆ அஹா ஆஆஆஆஆஆஆ
ஓஓஓஓஓஓஓ ஓஓஓஓஓஓ

ஒன்று எங்கள் ஜாதியே ஒன்று எங்கள் நீதியே
ஒன்று எங்கள் ஜாதியே ஒன்று எங்கள் நீதியே
உழைக்கும் மக்கள் யாவரும் ஒருவர் பெற்ற மக்களே
உழைக்கும் மக்கள் யாவரும் ஒருவர் பெற்ற மக்களே

வெள்ளை மனிதன் வேர்வையும் கருப்பு மனிதன் கண்ணீரும்
வெள்ளை மனிதன் வேர்வையும் கருப்பு மனிதன் கண்ணீரும்
உப்பு நீரின் வடிவிலே ஒன்று சேரும் கடலிலே
உப்பு நீரின் வடிவிலே ஒன்று சேரும் கடலிலே

ஒன்று எங்கள் ஜாதியே ஒன்று எங்கள் நீதியே
உழைக்கும் மக்கள் யாவரும் ஒருவர் பெற்ற மக்களே
உழைக்கும் மக்கள் யாவரும் ஒருவர் பெற்ற மக்களே

ஆதி மனிதன் கல்லை எடுத்து வேட்டை ஆடினான்
அடுத்த மனிதன் காட்டை அழித்து நாட்டைக் காட்டினான்
மற்றும் ஒருவன் மண்ணில் இறங்கிப் பொன்னைத் தேடினான்
ஆதி மனிதன் கல்லை எடுத்து வேட்டை ஆடினான்
அடுத்த மனிதன் காட்டை அழித்து நாட்டைக் காட்டினான்
மற்றும் ஒருவன் மண்ணில் இறங்கிப் பொன்னைத் தேடினான்
நேற்று மனிதன் வானில் தனது தேரை ஓட்டினான்
இன்று மனிதன் வெண்ணிலாவில் இடத்தைத் தேடினான்
நேற்று மனிதன் வானில் தனது தேரை ஓட்டினான்
இன்று மனிதன் வெண்ணிலாவில் இடத்தைத் தேடினான்
வரும் நாளை மனிதன் ஏழு உலகை ஆளப் போகிறான்
வரும் நாளை மனிதன் ஏழு உலகை ஆளப் போகிறான்

ஒன்று எங்கள் ஜாதியே ஒன்று எங்கள் நீதியே
உழைக்கும் மக்கள் யாவரும் ஒருவர் பெற்ற மக்களே
உழைக்கும் மக்கள் யாவரும் ஒருவர் பெற்ற மக்களே

மன்னராட்சி காத்து நின்றதெங்கள் கைகளே
மக்களாட்சி காணச் செய்ததெங்கள் நெஞ்சமே
எங்கள் ஆட்சி என்றும் ஆளும் இந்த மண்ணிலே
மன்னராட்சி காத்து நின்றதெங்கள் கைகளே
மக்களாட்சி காணச் செய்ததெங்கள் நெஞ்சமே
எங்கள் ஆட்சி என்றும் ஆளும் இந்த மண்ணிலே
கல்லில் வீடு கட்டித் தந்ததெங்கள் கைகளே
கருணை தீபம் ஏற்றி வைத்ததெங்கள் நெஞ்சமே
கல்லில் வீடு கட்டித் தந்ததெங்கள் கைகளே
கருணை தீபம் ஏற்றி வைத்ததெங்கள் நெஞ்சமே
இல்லை என்பதில்லை நாங்கள் வாழும் நாட்டிலே
இல்லை என்பதில்லை நாங்கள் வாழும் நாட்டிலே

ஆஆஆ ஆஆஆ அஹ்ஹா அஹஹா லலலா லலலா லலலா லலலா

ஒன்று எங்கள் ஜாதியே ஒன்று எங்கள் நீதியே
உழைக்கும் மக்கள் யாவரும் ஒருவர் பெற்ற மக்களே
உழைக்கும் மக்கள் யாவரும் ஒருவர் பெற்ற மக்களே

அறிவுக்கு வேலை கொடு

ஊழலுக்கு எதிரான போராட்டதுக்குத் தங்களது ஆதரவை இங்கே தெரிவிக்கவும்

மக்களால் மக்களுக்காக மக்களைக் கொண்டு நடக்கும் ஆட்சியே ஜனநாயக ஆட்சி என்று வரையறுத்து விட்டு, ஐந்தாண்டுகளுக்கொரு முறை அவதூறு பிரச்சாரங்களாலும், ஓட்டுக்குப் பணம் கொடுத்தும், இலவசங்களை வாரி வழங்கியும், கள்ள ஓட்டுப் போட்டும், கூலிக்கு ஆள் பிடித்துக் கருப்புப் பணத்தைச் செலவழித்துப் பேருந்துகள் மூலம் பல ஊர்களிலிருந்து ஆட்களை வரவழைத்துக் கூட்டத்தைச் சேர்த்துத் தம் வலிமையைக் காட்டியும் மோசடியான வழிகளில் தேர்தலில் வெற்றிபெற்றுப் பதவிக்கு வரும் மக்கள் பிரதிநிதிகளைக் கொண்டு அமையப் பெறும் ஆட்சி உண்மையில் மக்களின் பிரதிநிதிகளால், மக்களின் பிரதிநிதிகளுக்காக மக்களின் பிரதிநிதிகளைக் கொண்டு நடைபெறும் ஆட்சியாகவே விளங்குவது நம் நாட்டில் தற்போது நடைபெறும் போலி ஜனநாயகம். இதில் பதவிக்கு வந்தவுடன் மக்களின் ஓட்டுகளைப் பெற்று ஆட்சிக்கு வந்த அரசு பிரதிநிதிகள் மக்களின் தேவைகளைப் புறந்தள்ளி விட்டு சட்டவிரோதமான நடவடிக்கைகளாலும் ஊழலாலும் தாம் மட்டும் செல்வந்தர்களாக விளங்கும் முயற்சிகளை மட்டுமே மேற்கொண்டு வருகின்றனர்.

ஊழல் செய்யும் அரசு அதிகாரிகளையும், அமைச்சர்களையும், நீதி தவறிய நீதிபதிகளையும் தண்டிக்க எவ்வித வழியும் இல்லாத வகையிலான வலுவற்ற சட்டங்களை இயற்றிக் குற்றவாளிகள் தப்பிக்கவும் நேர்மையான அப்பாவி மக்கள் அவதிக்குள்ளாகவும் வழிவகுத்து மக்களை ஏமாற்றி வருகிறது இந்தியாவின் மத்திய அரசு. பல வருடங்களாக இந்திய மக்களிடம் கொள்ளையடித்த பெரும்பணத்தை அயல்நாட்டு வங்கிகளில் முடக்கி விட்டு சுதந்திரமாகத் திரியும் குற்றவாளிகளை தண்டிக்கவும் அவர்கள் சுருட்டிய பெரும்பணத்தைத் திரும்பப் பெற்று நாட்டு நலனுக்காகச் செலவிட வழிவகுக்கவும் வேண்டிய மத்திய அரசு அதற்கு நேர்மாறாகச் செயல் பட்டு எவ்வாறாகிலும் தங்கள் ஆட்சியைத் தக்க வைத்துக் கொள்வது குறித்து மட்டுமே சிந்தனை செய்து அதனை செயல்படுத்த முறைகேடான வழிகளில் மத்திய புலனாய்வுத் துறையைப் பயன்படுத்துகிறது. தினந்தோறும் பொது மக்களிடமிருந்து முறைகேடாக வசூலிக்கப் படும் லஞ்சப்பணம், நிலம் மற்றும் பிற சொத்துக்கள் விற்பனையின் தொடர்பான பத்திரப் பதிவுகளில் மோசடி செய்து சொத்துக்களின் மதிப்புத் தொகையைக் குறைத்து எழுதி பத்திரப் பதிவு மூலம் அரசுக்குக் கிடைக்கும் வருவாயைக் குறைப்பதுடன் கருப்புப் பணம் நாட்டில் பெருகவும் மட்டுமே தற்போதைய ஆட்சியும் சட்டதிட்டங்களும் உதவுகின்றன.

அரசாங்கத்தின் இத்தகைய மோசடிகளைச் சுட்டிக்காட்டி முறையான மக்கள் பாதுகாப்புச் சட்ட்டத்தை இயற்ற வலியுறுத்தி வரும் அன்னா ஹசாரே தலைமையில் செயல்படும் சமூக சேவகர்கள் அமைப்பை எவ்வாறேனும் அடக்கி ஒடுக்கிவிட்டுத் தங்களது அராஜக ஆட்சியைத் தொடரலாம் என மனப்பால் குடித்த மத்திய அரசின் பிரதிநிதிகள் இன்று செய்வதறியாது திகைக்கின்றனர். காரணம், அன்னா ஹசாரேயின் தலமையில் நடக்கும் அறப் போருக்கு ஆதரவாக லட்சக்கணக்கான மக்கள் நாடெங்கிலும் ஒன்று கூடித் தங்கள் மனத்தாங்கலை வெளிப்படுத்தி வருகின்றனர். ஆறாவது நாளாகத் தன் உண்ணாவிரதத்தைத் தொடரும் அன்னா ஹசாரே மக்கள் நலச் சட்டம் முறையாக இயற்றப்படும் வரையில் தொடர்ந்து போராடும் முடிவை அறிவித்துள்ளார். அவரது முடிவுக்கு அனைத்து மக்களும் ஆதரவாகவே உள்ளனர்.

அரசு பிரதிநிதிகள் இதுவரை தங்களது பகுத்தறிவை உபயோகிக்காது ஆணவத்தால் அறிவிழந்து கட்டவிழ்த்து விட்ட அடக்குமுறைகளைக் கைவிட்டு ஜனநாயகத்தைக் காக்க உடனடியாக உரிய நடவடிக்கை எடுப்பது நலம். அவ்வாறன்றித் தங்களது வழக்கமான வழியில் சதிகள் செய்து மக்களை மீண்டும் ஏமாற்ற முயல்வதும் அன்னா ஹசாரே போன்ற தன்னலமற்ற மக்கள் தலைவர்களுக்குக் குழி பறிப்பதும் தங்களுக்குத் தாங்களே குழி பறிக்கும் செயலாகவே முடியும். இந்த உண்மையை உணர்ந்து தங்களது தவறுகளைத் திருத்திக் கொண்டு செயல்பட்டால் அவர்கள் மன்னிக்கப் படலாம். இல்லாவிடில் அவர்கள் யாரும் பெரும் பழியிலிருந்தும் பேரழிவிலிருந்தும் பெரும் அவமானத்திலிருந்தும் தப்பிக்க இயலாத நிலை விரைவில் உருவாகும் அபாயம் உள்ளது.

அரசு பிரதிநிதிகளே! இது உங்களுக்கு இறுதி வாய்ப்பு. திருந்துங்கள், முறைகேடான சட்டத்தைத் திருத்துங்கள். மக்களைக் காக்கவும் குற்றவாளிகளைத் தண்டிக்கவும் ஊழல் மூலம் மக்களிடம் கொள்ளையடிக்கப் பட்ட பணம் முழுவதையும் மீட்கவும் உரிய நடவடிக்கை எடுங்கள். இல்லாவிடில் உங்களைக் காக்க அந்த ஆண்டவனாலும் இயலாமற் போய்விடும்.

அறிவுக்கு வேலை கொடு

திரைப்படம்: தலைவன்
இயற்றியவர்: வாலி
இசை: எஸ்.எம். சுப்பையா நாயுடு
பாடியவர்: டி.எம். சௌந்தரராஜன்

அறிவுக்கு வேலை கொடு பகுத்தறிவுக்கு வேலை கொடு
அறிவுக்கு வேலை கொடு பகுத்தறிவுக்கு வேலை கொடு
மூடப் பழக்கத்தை விட்டு விடு
காலம் மாறுது கருத்தும் மாறுது நாமும் மாற வேண்டும்
நம்மால் நாடும் மாற வேண்டும்

அறிவுக்கு வேலை கொடு பகுத்தறிவுக்கு வேலை கொடு

ஒன்பது வாசல் வைத்தே உடம்பென்னும்
கோட்டையைக் காட்டி வைத்தான் அந்தக்
கோட்டைக்கு விளக்காக அறிவென்னும்
தீபத்தை ஏற்றி வைத்தான்
ஒன்பது வாசல் வைத்தே உடம்பென்னும்
கோட்டையைக் காட்டி வைத்தான் அந்தக்
கோட்டைக்கு விளக்காக அறிவென்னும்
தீபத்தை ஏற்றி வைத்தான்
ஆகாத வழக்கமெல்லாம் அறிவுக்குப்
பொருந்தாத பழக்கமெல்லாம்
ஆக்கத்தைக் கெடுத்து வைக்கும் மனிதனின்
அழிவுக்கு வழி வகுக்கும்
ஆக்கத்தைக் கெடுத்து வைக்கும் மனிதனின்
அழிவுக்கு வழி வகுக்கும்

அறிவுக்கு வேலை கொடு பகுத்தறிவுக்கு வேலை கொடு

மண்வெட்டி கையிலெடுப்பார் சிலபேர்
மற்றவர்க்குக் குழி பறிப்பார் அது
தன் பக்கம் பார்த்திருக்கும் என்பதைத்
தானறிய மறந்திருப்பார்
மண்வெட்டி கையிலெடுப்பார் சிலபேர்
மற்றவர்க்குக் குழி பறிப்பார் அது
தன் பக்கம் பார்த்திருக்கும் என்பதைத்
தானறிய மறந்திருப்பார்
பந்தெடுத்து விட்டு எரிந்தால் சுவர் மேல்
பட்டது போல் திரும்பி வரும்
பந்தெடுத்து விட்டு எரிந்தால் சுவர் மேல்
பட்டது போல் திரும்பி வரும் இந்த்த்
தத்துவத்தைத் தானறிந்தால் பிறர்க்குத்
தீங்கு செய்யும் எண்ணம் வருமோ? இந்த்த்
தத்துவத்தைத் தானறிந்தால் பிறர்க்குத்
தீங்கு செய்யும் எண்ணம் வருமோ?

அறிவுக்கு வேலை கொடு பகுத்தறிவுக்கு வேலை கொடு
ஆஹாஹஹ ஹா

நீ எந்த ஊரு நான் எந்த ஊரு?

இந்தியா ஆங்கிலேயர் ஆட்சியை எதிர்த்துப் போராடி வென்ற்தற்கு முக்கியக் காரணகர்த்தா மஹாத்மா காந்தி ஆவார். சுதந்திரப் போருக்கு அவர் வகுத்து வழிநடத்தியது சத்தியாக்கிரகம் எனும் அஹிம்சை வழி. ஆங்கிலேய அரசின் அடக்குமுறையை எதிர்த்து நாடெங்கிலும் பொதுக்கூட்டங்கள் நடத்தியும், அந்நிய நாட்டுப் பொருட்களை நெருப்பிட்டு அழித்தும், சட்டத்தை மீறி உப்பளங்களில் உப்பெடுத்தும் மற்றும் பல வழிகளில் இந்திய மக்களை ஒன்று திரட்டி அவர் நடத்திய போராட்டத்தில் பங்கு பெற்றவர்கள் யாரும் வன்முறையைக் கையாளவில்லை. ஆங்கிலேய அதிகாரிகள் தடியால் அடித்த போதும் துப்பாக்கி குண்டுகளால் சுட்ட போதும் அவ்வதிகாரிகளை யாரும் திருப்பித் தாக்க முயற்சிக்கவில்லை.

"ஒருவன் உன்னை ஒரு கன்னத்தில் அறைந்தால் நீ மறு கன்னத்தைக் காட்டு" என இயேசுபிரான் கூறிய அறிவுரை வழியே நின்று மஹாத்மாவின் தலைமையில் நம் முன்னோர்கள் கோடானு கோடிப் பேர்கள் ஒன்றிணைந்து கத்தியின்றி ரத்தமின்றி நடத்திய யுத்தத்தின் பலனாகவே நமது நாட்டிற்குச் சுதந்திரம் கிடைத்தது. மஹாத்மா தொடுத்த அறவழிப் போருக்கு நெஞ்சில் இயல்பாக இரக்கமில்லாத ஆங்கிலேயர்களும் தலைவணங்கினர். அதே அறவழியில் இன்று இந்திய மக்கள் ஆயிரக்கணக்கில் நாட்டின் பல நகரங்களிலும் கிராமங்களிலும் மற்றும் பல அயல்நாடுகளிலுள்ள இந்திய தூதரகத்தின் முன்னரும் ஒன்று திரண்டு தற்போது நாட்டில் தலைவிரித்தாடும் லஞ்ச ஊழல் எனும் கொடுமையை எதிர்த்து, அக்கொடுமையை நீக்கவல்ல மக்கள் சட்டத்தைப் பல ஆண்டுகளாக இயற்றப் போவதாகக் கூறிக்கொண்டு செயலில் இறங்காமல் மக்களைத் தொடர்ந்து ஏமாற்றிவரும் அரசாங்கத்தை தகுந்த மக்கள் சட்டத்தை நிறைவேற்ற வைக்கும் உன்னத நோக்கத்துடன் காந்தியடிகள் வழியே அன்ன ஹசாரே எனும் உத்தமர் தலைமையில் போராடி வருகின்றனர்.

அன்னா ஹசாரே இம்முயற்சியில் மேற்கொண்டுள்ள உண்ணாவிரதத்தின் ஐந்தாம் நாள் நடந்து கொண்டிருக்கும் நிலையில் இந்திய அரசு இந்த அறவழிப் போராட்டத்தை முறியடிக்கும் ஓரே நோக்கத்துடன். இப்போராட்டத்துக்கு ஆர்.எஸ். எஸ். இயக்கம் ஆதரவளிக்கிறது என்றும், அரசைக் கவிழ்க்க நடத்தப்படும் எதிர்க்கட்சிகளின் சதிகளுள் இப்போராட்டமும் ஒன்று என்றும் இப்போராட்டத்தை அன்னா ஹசரேயின் மூலம் அமெரிக்கா நடத்துகிறது என்றும் பல்வேறு பொய்ப் பிரச்சாரங்களைக் கட்டவிழ்த்து விட்டதுடன் தொடர்ந்து மக்களை ஏமாற்றும் வழியில் மட்டுமே செயல்பட்டு வருவது வருந்தத் தக்கது. அசத்திய மார்க்கத்தில் செயல்படும் சுயநலவாதிகளைக் கொண்டு நடத்தப்படும் இந்த அரசுக்கு அறப் போராட்டத்தின் வலிமை இன்னும் புரியவில்லை என்றே தோன்றுகின்றது. இந்த அரசு எவ்வளவு தான் முயன்றாலும் நாள் தோறும் லஞ்ச ஊழலால் அவதியுறும் மக்களின் மனங்களில் கொழுந்து விட்டெறியும் சுதந்திர தாகத்தை அடக்க இயலாது.

லஞ்ச ஊழல் ஒழிந்து தவறு செய்யும் அதிகாரிகளும் அமைச்சர்களும் பிற குற்றவாளிகளும் உரிய காலத்தில் விரைந்து தம் குற்றங்களுக்குரிய தண்டனையைப் பெறும் நிலையை நாட்டில் ஏற்படுத்தத் தக்க மக்கள் சட்டம் இயற்றப்பட்டு செயல்படுத்தப்படும் வரையில் இந்த இரண்டாம் சுதந்திரப் போர் ஓயாது. "வந்தே மாதரம்! இங்குலாப் ஜிந்தாபாத்" எனும் சுதந்திர முழக்கமும் அடங்காது, உரக்க உரக்க மேலெழும். இந்திய மக்களாகிய நாம் நாட்டில் லஞ்ச ஊழல் ஒழிந்து அனைவரும் நல்வாழ்வு வாழ வேண்டுமெனில் அனைவரும் ஒற்றுமையுடன் அன்னா ஹசாரேயின் வழியில் தொடர்ந்து செயல்பட்டுப் போராட வேண்டும். நமது இப்போராட்டம் வெற்றி பெற்றால் நம் நாடு உலக அரங்கில் முன்னேற்றமடைந்து இந்தியா வல்லரசாகும் கனவும் நிறைவேறும்.

"பாரத நாடு பழம்பெரு நாடு நீரதன் புதல்வர் இந்நினைவகற்றாதீர்" எனும் மஹாகவி பாரதியாரின் வரிகளை நாம் என்றென்றும் மனதில் கொண்டு, "இந்தியா, என் தாய் நாடு, இந்தியர்கள் யாவரும் என் உடன் பிறந்தவர்கள்' எனும் கொள்கையுடன் நாம் வாழ்வது இப்போராட்டத்துக்கு வலிமை சேர்க்கும். அவ்வாறன்றி சுயநலத்துடன் நாமும் நம் குடும்பத்தினரும் மட்டும் நன்றாக இருந்தால் போதும் நாட்டிலுள்ள பிறர் எவ்வாறாகிலும் வாடட்டும் எனும் போக்கில் நடந்தால் நம் நாடு உலக அரங்கில் முன்னேற்றமடைவது கடினம்.

நீ எந்த ஊரு நான் எந்த ஊரு?

திரைப்படம்: திருப்பாச்சி
இயற்றியவர்: பேரரசு
இசை: தீனா, மணி ஷர்மா, தேவி ஸ்ரீ ப்ரசத்
பாடியவர்: திப்பு

வாரே வாரே வாராரே அ தள்ளு வாரே வாரே வாராரே ஒத்துடா
வாரே வாரே வாராரே அடங்குடா
மச்சி மச்சி மச்சி மச்சி மச்சி மச்சி மச்சான்

நீ எந்த ஊரு நான் எந்த ஊரு? முகவரி தேவையில்லே இல்லே இல்லே
நீ என்ன உறவு நான் என்ன உறவு? சொந்தத்தில் அர்த்தமில்லே இல்லே இல்லே
தொப்புள் கொடி உறவா? இல்லே இல்லே ஏ
கட்சிக் கொடி உறவா? இல்லே இல்லே ஹை
மேட்டுக்குடி உறவா? இல்லே இல்லே அட
கள்ளுக் கடை உறவா? இல்லவே இல்லே

உன்னை யாரோ பெத்திருக்க என்னை யாரோ பெத்திருக்க
ஆனாலும் நீயும் நானும் அண்ணன் தம்பிடா ஹேய்
உன்னை யாரோ பெத்திருக்க என்னை யாரோ பெத்திருக்க
ஆனாலும் நீயும் நானும் அண்ணன் தம்பிடா

நீ எந்த ஊரு நான் எந்த ஊரு? முகவரி தேவையில்லே
இல்லே இல்லே இல்லே இல்லே
நீ என்ன உறவு நான் என்ன உறவு சொந்தத்தில் அர்த்தமில்லே
இல்லே இல்லே இல்லே இல்லே

எம்மோ எம்மோ எம்மோ எம்மோ
எம்மோ எம்மோ எம்மோ எம்மோ
எம்மோ எம்மோ எம்மோ எம்மோ
கக்காலக்கா கக்காலக்கா கக்காலக்கா கா
ஹே ஹே ஹேஹேஹே ஹே ஹே ஹேஹேஹே

சாமி வரம் தந்துட்டா ஓஓஓஓஓ கொட்டும் மழை கொட்டுண்டா
ஏழை மனம் பொங்குண்டா ஓஓஓஓஓ நன் ஐயனாரு பக்தண்டா
மண்ணை நம்பி வேரு விண்ணை நம்பி ஆறு
என்னை நம்பி யாரும் கெட்டதில்லை பாரு ஓஓஓஓ ஓஓஓஓ
ஒனக்கொரு பேரு எனக்கொரு பேரு
ஒண்ணு சேத்துப் பாரு இந்தியன்னு பேரு ஓஓஓஓ ஓஓஓஓ

பொறப்பும் இறப்பும் அவன் கையிலே நாம
வாழும் வாழ்க்கை நம்ம கையிலே ஹேய்
பொறப்பும் இறப்பும் அவன் கையிலே நாம
வாழும் வாழ்க்கை நம்ம கையிலே ஹே

நீ எந்த ஊரு நான் எந்த ஊரு? முகவரி தேவையில்லே
இல்லே இல்லே இல்லே இல்லே
நீ என்ன உறவு நான் என்ன உறவு? சொந்தத்தில் அர்த்தமில்லே
இல்லே இல்லே இல்லே இல்லே

அல்லேலல்லே லேலல்லோ தோதோதோ
அல்லேல்ல்லே லேலல்லோ தோ
அல்லேலல்லே லேலல்லோ தோதோதோதோ
அல்லேல்ல்லே லேலல்லோ தோ
அல்லேலல்லே லேலத்தோ ஹேய் அல்லேலல்லே லேலத்தோ
அல்லேலல்லே லேலத்தோ ஹேய் அல்லேலல்லே லேலத்தோ
ஆஹா ஆஆஆஆஆ ஏஹே ஏஏஏஏஏ

அம்மையப்பன் தானடா நம்மையாளும் சாமிடா
கருவறைத் தொழிடா நம்ம உயிர் நாடிடா
கண்ணப் பொத்திப் பாரு காதைப் பொத்தி வாழு
வாயைப் பொத்தி வாழு நம்ம காந்தி மொழி கேளு ஓஓஓஓ ஓஓஓஓ
ஆத்திகந்தான் மூச்சு சத்தியந்தான் பேச்சு
ஆசையெல்லாம் போச்சு நம்ம புத்தர் கொடியேத்து ஓஓஓஓ ஓஓஓஓ

அட பொறப்பும் இறப்பும் அவன் கையிலே நாம
வாழும் வாழ்க்கை நம்ம கையிலே ஹே
பொறப்பும் இறப்பும் அவன் கையிலே நாம
வாழும் வாழ்க்கை நம்ம கையிலே

நீ எந்த ஊரு
நீ எந்த ஊரு நான் எந்த ஊரு? முகவரி தேவையில்லே இல்லே இல்லே
நீ என்ன உறவு நான் என்ன உறவு? சொந்தத்தில் அர்த்தமில்லே இல்லே இல்லே
தொப்புள் கொடி உறவா இல்லே இல்லே
கட்சிக் கொடி உறவா? இல்லே இல்லே
மேட்டுக்குடி உறவா? இல்லே இல்லே அட
கள்ளுக் கடை உறவா? இல்லவே இல்லே

உன்னை யாரோ பெத்திருக்க என்னை யாரோ பெத்திருக்க
ஆனாலும் நீயும் நானும் அண்ணன் தம்பிடா ஹேய்
உன்னை யாரோ பெத்திருக்க என்னை யாரோ பெத்திருக்க
ஆனாலும் நீயும் நானும் அண்ணன் தம்பிடா நாம அண்ணன் தம்பிடா