தை பொறந்தா வழி பொறக்கும்

பழையன கழிதலும் புதியன புகுதலும் வேண்டி போகிப் பண்டிகையுடன் தொடங்கும் இப்பொங்கல் திருநாள் தமிழ் மக்கள் அனைவருக்கும் நல்வாழ்வை நல்கும் விதமாக அமைய இறைவனை வேண்டுகிறேன்.

http://www.educationalservice.net/2012/january/20120165_awesome.php

இந்திய மாநிலங்களுக்கிடையேயான நதி நீர்ப் பங்கீடு தொடர்பான பிரச்சினைகளுள் தமிழ்நாட்டுக்கும் கர்நாடக மாநிலத்துக்குமிடையே நிலவி வரும் காவிரி நீர்ப் பிரச்சினையே பெரிதென எண்ணி வந்த நிலையில் அதனை விடவும் மிகப்பெரியதான பிரச்சினையாக உருவெடுத்துள்ளது தமிழகத்துக்கும் கேரளத்துக்கும் இடையேயான முல்லைப் பெரியாறு அணைப் பிரச்சினை. பருவமழை நன்கு பெய்யும் காலங்களில் போதிய அளவு நீர் காவிரி நதியிலிருந்து தமிழக விவசாயிகளுக்குக் கிடைப்பதால் அந்த ஆண்டு காவிரிப் பிரச்சினை எழுவதில்லை. ஆனால் அதற்கு மாறாக முல்லைப் பெரியாறிலிருந்து தமிழகத்துக்குத் தண்ணீர் கிடைக்காமல் செய்ய வழி தேடுகின்றனர் கேரள அரசியல்வாதிகள். இப்பிரச்சினையில் உச்சநீதி மன்றத்தின் தீர்ப்பையும் மதிக்காமல் கேரள மாநில அரசு செயல்படுவதால் இரு மாநில மக்களிடையே தீராத பிரச்சினை உருவாக வழி வகுத்துள்ளது. ஆண்டாண்டு காலமாகத் தமிழகத்திலிருந்து சபரிமலைக்குச் செல்லும் ஐயப்ப பக்தர்கள் தாக்கப்படுகின்றனர். தமிழகத்துக்கு வரும் கேரள மக்கள் தாக்கப் படுகின்றனர். கேரளாவுக்கு வழக்கமாகத் தமிழகத்திலிருந்து கொண்டு செல்லும் உணவு முதலிய அத்தியாவசியப் பொருட்கள் செல்ல முடியாத சூழ்நிலையை உருவாக்கி இரு மாநில மக்களும் துன்புறும் நிலையை விளைவித்து வேடிக்கை பார்க்கும் அரசியல்வாதிகளின் சூழ்ச்சியை இரு மாநில மக்களும் உணர வேண்டும்.

முன்பிருந்தது போலவே இரு மாநில மக்களும் சகோதர பாவனையுடன் பழகவும் தமிழக விவசாயிகளுக்குத் தொடர்ந்து முல்லைப் பெரியாறிலிருந்து நீர் கிடைத்து விவசாயம் செழித்து இரு மாநில மக்களும் தவறாது பயன் பெறவும் உரிய சூழ்நிலை உருவாக வேண்டும்.

ஆற்று மணல் கொள்ளை தடுக்கப் படல் வேண்டும். அதனால் ஏற்படும் நிலத்தடி நீர்க் குறைபாடு நீங்க வேண்டும். ஆலைக் கழிவுகளால் நதி நீர் மாசுபடுவது தடுக்கப் பட வேண்டும். சிறிது காலத்திற்கு முன்பு வரை இருந்தது போல் சுத்தமான குடிநீர் நதிகளிலிருந்தும் கிணறுகளிலிருந்தும் மக்கள் அனைவருக்கும் தடையின்றிக் கிடைக்க வழி ஏற்பட வேண்டும். விவசாயிகளது விளைநிலங்கள் செயற்கை உரங்களாலும், பூச்சிக் கொல்லி மருந்துகளின் பாதிப்பாலும் நச்சுத் தன்மையடைவது தடுக்கப் பட்டுப் பண்டைய இயற்கை விவசாய முறையை அனைத்து விவசாயிகளும் நடைமுறைப்படுத்தி விளைச்சல் பெருக வழி ஏற்பட வேண்டும்.

விவசாயிகள் கடன் சுமையாலும், இடைத்தரகர்களினால் ஏற்படும் வருவாய் இழப்பாலும் வருந்தும் நிலை மாற வேண்டும். உழைப்பவர் உயரும் நிலை வர வேண்டும். மத்தியிலும் மாநிலத்திலும் நல்லாட்சி நிலவ வேண்டும். மக்கள் யாவரும் எல்லா வளங்களும் குறைவின்றி நிறையப் பெற்று சுகவாழ்வு வாழ வேண்டும். விலைவாசிகள் குறைய வேண்டும். நம் வருங்கால சந்ததிகள் இவ்வுலகில் நாம் வாழ்ந்ததை விடவும் அதிக வசதிகளோடும் மகிழ்ச்சியோடும் ஒற்றுமை உணர்வுடன் நீளாயுள் பெற்று வாழ வேண்டும்.

பொங்கல் திருநாள் எல்லாருக்கும் எல்லா நலன்களையும் அருளப் பிரார்த்திப்போம்.

அருட் பேராற்றல் கருணையினால் உடல் நலம் நீளாயுள், நிறை செல்வம் உயர் புகழ் மெய்ஞானம் ஓங்கி வாழ்க!  அருட் பேராற்றல் இரவும் பகலும், எல்லா நேரங்கலிலும், எல்லா இடங்கலிலும், எல்லாத் தொழில்களிலும், 

உறுதுணையாகவும், பாதுகாப்பாகவும், வழி நடத்துவதாகவும் அமையுமாக! 

வாழ்க வையகம்! வாழ்க வளமுடன்! 

தை பொறந்தா வழி பொறக்கும்

திரைப்படம்: தை பிறந்தால் வழி பிறக்கும்

இயற்றியவர்: ஏ. மருதகாசி

இசை: கே.வி. மஹாதேவன்

பாடியோர்: டி.எம். சௌந்தரராஜன், பி. சுசீலா

தை பொறந்தா வழி பொறக்கும் தங்கமே தங்கம்

தங்கச் சம்பா நெல் விளையும் தங்கமே தங்கம்

தை பொறந்தா வழி பொறக்கும் தங்கமே தங்கம்

ஆடியிலே வெதை வெதைச்சோம் தங்கமே தங்கம்

ஐப்பசியில் களையெடுத்தோம் தங்கமே தங்கம்

கார்த்திகையில் கதிராச்சு தங்கமே தங்கம்

கார்த்திகையில் கதிராச்சு தங்கமே தங்கம்

கழனியெல்லாம் பொன்னாச்சு தங்கமே தங்கம்

தை பொறந்தா வழி பொறக்கும் தங்கமே தங்கம்

தங்கச் சம்பா நெல் விளையும் தங்கமே தங்கம்

தை பொறந்தா வழி பொறக்கும் தங்கமே தங்கம்

கன்னியரின் மனசு போலே தங்கமே தங்கம்

கல்யாணமாகுமடி தங்கமே தங்கம் ஆமா

கன்னியரின் மனசு போலே தங்கமே தங்கம்

கல்யாணமாகுமடி தங்கமே தங்கம்

வண்ண மணி கைகளிலே தங்கமே தங்கம்

வண்ண மணி கைகளிலே தங்கமே தங்கம் ஆமா

வளையல்களும் குலுங்குமே தங்கமே தங்கம்

தை பொறந்தா வழி பொறக்கும் தங்கமே தங்கம்

தங்கச் சம்பா நெல் விளையும் தங்கமே தங்கம்

தை பொறந்தா வழி பொறக்கும் தங்கமே தங்கம்

சுத்தச் சம்பா நெல்லு குத்தி தங்கமே தங்கம்

முத்ததிலே சோறு பொங்கி தங்கமே தங்கம்

குத்து வெளக்கேத்தி வச்சு தங்கமே தங்கம்

குத்து வெளக்கேத்தி வச்சு தங்கமே தங்கம்

கொண்டாடி மகிழ்ந்திடுவோம் தங்கமே தங்கம்

தை பொறந்தா வழி பொறக்கும் தங்கமே தங்கம்

தங்கச் சம்பா நெல் விளையும் தங்கமே தங்கம்

தை பொறந்தா வழி பொறக்கும் தங்கமே தங்கம்

உள்ளத்திலே உரம் வேணுமடா

வாழ்க்கை என்பது ஒரு போராட்டம். அதில் நாமெல்லோரும் நம்மையறியாமல் தள்ளப்பட்டுள்ளோம். இங்கே தனது இலக்கு எது என்பதைத் தெளிவாக உணர்பவன் வெற்றியடைகிறான். இலக்கில்லாமல் இன்ப நாட்டம் கொண்டு அலைபவன் தோல்வியடைகிறான். ஒவ்வொருவரும் தன் வாழ்வின் இலக்கை நிர்ணயிக்கையில் அது ஒரு மாபெரும் வெற்றியைத் தேடித்தருவதாக அமைத்துக்கொள்தல் அவசியம். அத்தகைய வெற்றி தன் ஒருவருக்கு மட்டுமின்றித் தன்னைச் சேர்ந்த பலருக்கும் ஏனைய சமுதாயத்தினருக்கும் நன்மை பயப்பதாக அமையுமாகில் அது புகழைத் தேடித் தருகிறது. பிறரது நலன் கருதாமல் தனது சுகம் ஒன்றை மட்டுமே கருதி நிர்ணயிக்கப்படும் இலட்சியம் புகழைத் தராது மாறாகப் பிறர் நம்மை இகழ்ந்து வெறுத்தொதுக்கும் நிலையை ஏற்படுத்தக்கூடும். உதாரணத்துக்கு மருத்துவத் துறையில் ஆராய்ச்சி செய்யும் ஒருவர் தன் ஆராய்ச்சியின் வாயிலாகப் புதிய மருந்தொன்றைக் கண்டுபிடிக்கையில் அம்மருந்து சொற்ப செலவிலோ இலவசமாகவோ உலகிலுள்ள மக்கள் அனைவருக்கும் பயன்படுமானால் அவர் அடையும் புகழுக்கு அளவேயில்லை. மாறாகத் தன் கண்டுபிடிப்பு பெரும் தொகை செலவழித்து மருத்துவ சிகிச்சை பெற முன்வருவோர்க்கு மட்டுமே பயன் பட்டு அதனால் பெரும் செல்வம் ஈட்ட அவர் முற்படுவாரெனில் அவர் பொருள் ஒன்றைத் தவிர வேறு எவ்விதப் பயனையும் அடைய மாட்டார், புகழையும் அடையார்.

இலக்கை நிர்ணயித்த பின்னர் அதனை அடையப் பாடுபட வேண்டும். எந்த ஒரு உன்னத இலட்சியத்தையும் ஒருவர் அடைய முயல்கையில் ஏனைய அனைவரும் அவருக்கு உறுதுணையாயிருப்பர் என்பதற்கு எவ்வித உத்தரவாதமுமில்லை. மாறாக அவர் தனது இலட்சியத்தை அடைய விடாமல் அவரது முயற்சிகளுக்கு முட்டுக் கட்டை போட்டு அவரைத் தோல்விப்பாதையில் செலுத்தப் பலர் முற்படக்கூடும். அவரது முயற்சியை எள்ளி நகையாடி அவமரியாதை செய்யக்கூடும். அத்தகைய தீய சக்திகளின் முயற்சிகளுக்கு பலியாகாமல் தன் இலட்சியப் பாதையில் தொடர்ந்து செல்லஒருவர்க்கு மிகவும் இன்றியமையாதவை உள்ளத்துறுதியும் உண்மை உழைப்பும் அனைவரிடமும் கொள்ளும் ஒற்றுமை உணர்வுமே ஆகும்.

மெய்வருத்தம் பாரார் பசிநோக்கார் கண்டுஞ்சார்

எவ்வெவர் தீமையு மேற்கொள்ளார் - செவ்வி

அருமையும் பாரா ரவமதிப்புங் கொள்ளார்

கருமமே கண்ணாயி னார்

எனும் குமரகுருபரர் நீதி நெறி விளக்கப் பாடல் தரும் அறிவுரைகளை மனதில் நிலைநிறுத்தித் தன் முயற்சியை என்றும் கைவிடாது தொடர்ந்து தன் இலட்சியப் பாதையில் பயணம் செய்பவர் வெற்றியடைவது உறுதி.

உள்ளத்திலே உரம் வேணுமடா

திரைப்படம்: விஜயபுரி வீரன்

இயற்றியவர்: கே. ஆத்மநாதன்

இசை: டி.ஆர். பாப்பா

பாடியவர்: ஏ.எம். ராஜா

உள்ளத்திலே உரம் வேணுமடா

உள்ளத்திலே உரம் வேணுமடா

உண்மையிலே திறம் காணுமடா

ஒற்றுமையால் வெற்றி ஓங்குமடா

உள்ளத்திலே உரம் வேணுமடா

உள்ளத்திலே உரம் வேணுமடா

உண்மையிலே திறம் காணுமடா

ஒற்றுமையால் வெற்றி ஓங்குமடா

வல்லவன் போலே பேசக்கூடாது

வானரம் போலே சீறக்கூடாது

வல்லவன் போலே பேசக்கூடாது

வானரம் போலே சீறக்கூடாது

வாழத் தெரியாமலே கோழைத்தனமாகவே

வாலிபத்தை விட்டு விடக் கூடாது

வாழத் தெரியாமலே கோழைத்தனமாகவே

வாலிபத்தை விட்டு விடக் கூடாது

மானம் ஒன்றே பிரதானமென்றே

மறந்து விடாதே வாழ்வினிலே

மானம் ஒன்றே பிரதானமென்றே

மறந்து விடாதே வாழ்வினிலே

உள்ளத்திலே உரம் வேணுமடா

உள்ளத்திலே உரம் வேணுமடா

உண்மையிலே திறம் காணுமடா

ஒற்றுமையால் வெற்றி ஓங்குமடா

வண்டியும் ஒரு நாள் ஓடத்திலேறும்

ஓடமும் ஒரு நாள் வண்டியிலேறும்

வண்டியும் ஒரு நாள் ஓடத்திலேறும்

ஓடமும் ஒரு நாள் வண்டியிலேறும்

ஏட்டுச் சுரைக்காயெல்லாம் மூட்டை கட்டியாகணும்

நாட்டினிலே வீரம் பொங்கும் நாள் வரணும்

ஏட்டுச் சுரைக்காயெல்லாம் மூட்டை கட்டியாகணும்

நாட்டினிலே வீரம் பொங்கும் நாள் வரணும்

மானம் ஒன்றே பிரதானமென்றே

மறந்து விடாதே வாழ்வினிலே

மானம் ஒன்றே பிரதானமென்றே

மறந்து விடாதே வாழ்வினிலே

உள்ளத்திலே உரம் வேணுமடா

உள்ளத்திலே உரம் வேணுமடா

உண்மையிலே திறம் காணுமடா

ஒற்றுமையால் வெற்றி ஓங்குமடா

உள்ளத்திலே உரம் வேணுமடா

உள்ளத்திலே உரம் வேணுமடா

உண்மையிலே திறம் காணுமடா

ஒற்றுமையால் வெற்றி ஓங்குமடா

இன்பக் கனா ஒன்று கண்டேன்

மாயா உலகிலே மனம் மயங்கி மதி கலங்கி எதற்கெடுத்தாலும் வாடுவதும் வருந்துவதுமாக ஓயாத் துயர்பட்டு உழலும் மானுடர்களே! தேக சம்பத்தால் விளைந்த ஆணவமெனும் தொழுநோய் பிடித்தும் தேம்பியலையும் மனதைத் தேற்ற வழி தெரியாமல் துயருறும் நம் துன்பங்கள் யாவும் நீக்கி இன்பமெய்த வழி ஒன்றே ஆகும். அதுவே தெய்வபக்தி. நான் என்பதும் நீ என்பதும் எனது உனதென்பதும் அறியாமையால் விளையும் பொய்த் தோற்றங்களே என்பதை உணர்ந்தால் இவ்வுலகில் உள்ள பொருட்களாலும் ஐம்புலன்களால் நாம் அடையும் சிற்றின்பங்களாலும் மயங்காமல் உள்ளத் தெளிவுபெற்று உய்யலாம். அழியும் உடல்களைத் தாங்கி ஆணவத்தாலழியும் மானுடரிடம் மெய்யன்பை எதிர்பார்த்து ஏமாற்றமடையாமல் அழியா மெய்ப்பொருளான ஆண்டவனைச் சரணடைந்து அவன் மேல் அன்பு கொண்டு அவன் அருள் மழையில் நனைந்து மகிழ்வதே பேரின்பமாகும். 

கோதை ஆண்டாள் பிள்ளைப் பிராயத்திலேயே கண்ணன் மேல் அளவிலா அன்பு கொண்டு அவனையே தன் மணாளனாக வரித்தாள். அவனுக்கு தினமும் தன் கைகளாலேயே அழகிய மலர் மாலைகளைத் தொடுத்து, அதனை அவன் அணியுமுன்னர் தான் அணிந்து மகிழ்ந்து அவன் நாமமதே மூச்சாக வாழ்ந்திருந்து அவனை அடைந்து அவனுடன் ஐக்கியமாகி மாயையிலிருந்து விடுபட்டு இறைநிலையெய்தினாள். தேவர் தலைவன் மகள் தெய்வயானையும் மலைக்குறமகள் வள்ளியும் முருகனையே மணாளனாக அடையவேண்டித் தவம் புரிந்து அவனை மணமுடித்து அவனோடு இரண்டறக் கலந்து தெய்வநிலையெய்தினர். 

பண்டைத் தமிழ்ப்புலவர்கள் இத்தகைய இறைக்காதலில் பெண்களைக் காதலியாகவும் இறைவனைக் காதலனாகவும் வைத்துத் தம் காவியங்களைப் படைத்தனர். மஹாகவி பாரதியார் இந்நிலையிலிருந்து மாறுபட்டு ஆணைக் காதலனாகவும் இறைவியைக் காதலியாகவும் வைத்துக் கவிதைகள் புனைந்தார். 

திருமணப் பருவமெய்திய ஒவ்வொருவரும் தனக்கு அமையவிருக்கும் வாழ்க்கைத் துணையை எண்ணிக் கனவு காண்பது இயல்பேயாயினும் அக்கனவுகளில் அடையும் சுகம் மிகவும் சொற்பமானதே. ஆனால் அந்த தெய்வத்தையே மணாளனாக வரித்த இப்பெண்டிர் காணும் கனவோ பேரின்பம் தரவல்லது என்பதை யாரும் சொல்லித் தெரிய வேண்டியதில்லை. இறைவன் அருள் பெற்று ஆட்கொள்ளப் படும் ஒருபக்தையின் பரவச நிலைக்கு ஈடு இணை கிடையாது. அவள் எய்தும் இன்பத்துக்கு அளவும் முடிவும் கிடையாது. என்றென்றும் நிலையான இன்பநிலை பெற விரும்புவோர் செய்யத்தக்கது இறைவனைச் சரணடைதல் ஒன்றாயாகும். இறைவன் மேல் கொள்ளும் காதலால் விளையும் இன்பம் தேக சம்பந்தம் உள்ளதல்ல, அது ஆன்மா ஆண்டவனுடன் ஐக்கியமாகும் நிலையாகும். அழகன் முருகன் மேல் ஆசை வைத்த ஒரு பக்தை பாடுவதாக அமைந்த பாடலொன்று இன்றைய பாடலாக மலர்கிறது.

இன்பக் கனா ஒன்று கண்டேன்

இயற்றியவர்: கு.சா. கிருஷ்ணமூர்த்தி

பாடியவர்: எம்.எம். தண்டபாணி தேசிகர்

இன்பக் கனா ஒன்று கண்டேன்

இன்பக் கனா ஒன்று கண்டேன் பாங்கி

இன்பக் கனா ஒன்று கண்டேன் பாங்கி

என்னுளம் மகிழ்வு கொண்டேன் என் பாங்கி

இன்பக் கனா ஒன்று கண்டேன் பாங்கி

என்னுளம் மகிழ்வு கண்டேன் என் பாங்கி

இன்பக் கனா ஒன்று கண்டேன்

தென்பழனி ஊரன் சேவற்கொடிக் காரன்

தென்பழனி ஊரன் சேவற்கொடிக் காரன்

என்னுயிர்க் காதாரன் இரவில் எனையடைய

என்னுயிர்க் காதாரன் இரவில் எனையடைய

இன்பக் கனா ஒன்று கண்டேன்

பன்னிரு தோளழகும் பரந்த விழியழகும்

மின்னொளி வேலழகும் மேனியழகும்

பன்னிரு தோளழகும் பரந்த விழியழகும்

மின்னொளி வேலழகும் மேனியழகும் காதல்

கன்னல் மொழியழகும் களிற்றின் நடையழகும்

கன்னல் மொழியழகும் களிற்றின் நடையழகும்

பொன்மயில் தன்னழகும் புன்னகையின் அழகும்

பொன்மயில் தன்னழகும் புன்னகையின் அழகும்

இன்பக் கனா ஒன்று கண்டேன் பாங்கி

என்னுளம் மகிழ்வு கொண்டேன் என் பாங்கி

இன்பக் கனா ஒன்று கண்டேன்

தென்றல் மலர் மணத்தை வாரியிறைத்தெங்கும்

திங்கள் நடந்ததென்தன் தேகம் சிலிர்த்தது

தென்றல் மலர் மணத்தை வாரியிறைத்தெங்கும்

திங்கள் நடந்ததென்தன் தேகம் சிலிர்த்தது

அன்றிற் பேடோடு நடம் ஆடிக்களித்த போது

அன்றிற் பேடோடு நடம் ஆடிக்களித்த போது

ஆறுமுகன் வந்தென்னை அணைந்து சுகித்ததைப் போல்

ஆறுமுகன் வந்தென்னை அணைந்து சுகித்ததைப் போல்

இன்பக் கனா ஒன்று கண்டேன்

முன்னர் யான் கண்டறியா மோகக் கிளர்ச்சி பல

மூண்டது என்னுள்ளத்தில் முற்றும் எனை மறந்தேன்

முன்னர் யான் கண்டறியா மோகக் கிளர்ச்சி பல

மூண்டது என்னுள்ளத்தில் முற்றும் எனை மறந்தேன்

உன்னைக் கைவிடேன் என்றோர் உறுதிமொழியும் தந்தான்

உன்னைக் கைவிடேன் என்றோர் உறுதிமொழியும் தந்தான்

ஒப்பிவிட்டேன் நானினி தப்பிதம் ஏதுமுண்டோ?

ஒப்பிவிட்டேன் நானினி தப்பிதம் ஏதுமுண்டோ?

இன்பக் கனா ஒன்று கண்டேன்

அன்புடன் பேசி என்னை அணைத்துப் பிடித்திழுத்தான்

அதரம் கனிய முத்தம் அமுதமெனக் கொடுத்தான்

அன்புடன் பேசி என்னை அணைத்துப் பிடித்திழுத்தான்

அதரம் கனிய முத்தம் அமுதமெனக் கொடுத்தான்

துன்பம் பிறப்பிறப்பு சோர்வுமில்லாதொழித்தான்

துன்பம் பிறப்பிறப்பு சோர்வுமில்லாதொழித்தான்

தோகையே இதன் பயன் சொல்லடி நீயறிந்தால்

தோகையே இதன் பயன் சொல்லடி நீயறிந்தால்

இன்பக் கனா ஒன்று கண்டேன் பாங்கி

என்னுளம் மகிழ்வு கொண்டேன் என் பாங்கி

இன்பக் கனா ஒன்று கண்டேன்

எத்தனை எத்தனை இன்பமடா

உலகிலுள்ள ஜீவராசிகளுள் மிகவும் உயர்ந்தவர்கள் மனிதர்கள் எனவும் மனிதர்கள் ஆறறிவு படைத்தவர்கள் எனவும் நாம் பெருமிதம் கொள்கிறோம், ஆனால் நாம் வாழும் முறையும் நடந்துகொள்ளும் விதமும் அதற்கு ஏற்றாற்போல் உள்ளனவா என்று சிந்தித்துப் பார்க்கையில் நமக்குள்ளே ஐயம் எழுகிறது, உண்மையிலேயே  நாம் ஆறறிவு படைத்தவர்களா என. சிற்றெரும்புகள் சாரை சாரையாகச் சென்று உணவு எங்கிருந்தாலும் அதைத் தம் மறைவான இருப்பிடத்துக்குக் கொண்டு சேர்க்க ஒன்று சேர்ந்து உழைக்கின்றன. பகிர்ந்துண்டு வாழ்கின்றன. நம்மில் அனேகர் தினமும் காலையில் காக்கைகளுக்கு உணவளித்த பின்னரே உண்கிறோம். அவ்வாறு நாம் அளிக்கும் உணவைக் காக்கைகள் தன் இனத்தைக் காகா என்று கூவியழைத்து ஒன்று சேர்ந்து உண்கின்றன. ஏனைய பிற உயிரினங்களும் இவ்வாறே உணவைத் தம் இனத்துடன் சேர்ந்து உண்கின்றன. நாம் என்ன செய்கிறோம்?

 நெற்றி வியர்வை நிலத்தில் விழப் பாடுபட்டு உழைத்து மனித குலத்தவர்க்கு உணவை உற்பத்தி செய்யும் விவசாயிகளின் விளைபொருட்களை மிகவும் குறைந்த விலைக்கு இடைத் தரகர்கள் மூலம் வாங்கி அவற்றைப் பத்து மடங்கு விலைக்கு சந்தையில் விற்கிறோம். விவசாயிகளின் வயிற்றில் அடிக்கிறோம். அவர்கள் தம் விளைநிலங்களை விற்கத் தூண்டி அந்நிலங்களை அழிக்கிறோம். நாட்டையும் நாட்டு மக்களையும் காக்க்கவென்று நாம் தேர்ந்தெடுக்கும் அரசியல்வாதிகள் தம் கடமையை மறந்து சுயநலம் பேணுவதையும் தாம் மட்டும் பெரும்பொருள் சேர்த்து வாழ நாட்டு மக்களை வறுமையில் வாடவிட்டுப் பின் அவர்களைப் பிச்சையெடுக்கும் நிலைக்குத் தள்ளுவதற்கொப்பாக இலவச அரிசி என்றும் ஏழைகள் மறுவாழ்வு  பெற உதவுகிறோம் என்று நலத்திட்ட உதவிகள் எனும் பெயரில் மேலும் கொள்ளையடித்து விலைவாசியை ஏற்றி சமுதாயத்தை சீர்குலைக்கின்றனர். 

முறையாக ஆட்சி நடைபெற்றால் அனைவருக்கும் கல்வியும், வேலை வாய்ப்பும், மருத்துவ உதவியும் தவறாது கிடைக்கும் எனும் நிலையிருக்கையில் சாதி மதங்களின் பெயரால் இட ஒதுக்கீடு எனப் பாகுபாடு செய்து மக்களிடையே ஒற்றுமை குலையக் காரணமாகும் அரசியல்வாதிகளின் சூழ்ச்சியை உணராமல் நாம் நம்முள்ளே சண்டை செய்து வேற்றுமையை வளர்க்கிறோம்.

இவ்வுலகில் இல்லாததொன்றில்லை. இயற்கை வளங்கள் எல்லாம் நமக்கே சொந்தம். அவற்றை முறையாகப் பகிர்ந்துண்டு வாழ்வோமெனில் அனைவருக்கும் வாழ்க்கைக்குத் தேவையான அனைத்தும் உறுதியாகக் கிடைக்கும் என்பதை உணராமல் நாம் ஒவ்வொருவர் பெயரிலும் சொத்து சேர்க்கவும் பிறரை விட வசதியான வாழ்வு வாழவும் மட்டும் பாடுபடுகிறோம். இத்தகைய சுயநல முயற்சிகளில் மனதைச் செலுத்தி இயற்கை வளங்கள் அழிக்கப்படுவதைக் கண்டும் காணாமல் வாழ்கிறோம். பதவியிலிருப்பவர்கள் ஆற்று மணலை தினமும் அள்ளிச் சென்று நிலத்தடி நீர் வற்றச் செய்வதும் ஆறுகள் வற்றிப் போகச் செய்வதும் கண்கூடாகத் தெரிந்தும் நாம் இத்தகைய முறைகேடுகளைத் தடுக்க ஒன்று சேர்ந்து போராடுவதில்லை. 

இறைவன் நமக்கு அளித்துள்ள இன்பங்களை அனுபவிக்காமல் நம்மிடம் இல்லாததை நினைத்து ஏங்குவதும் வாழ்நாளை வீணாக்கி நம்மை நாமே துன்புறுத்திக் கொள்வதுடன் பிறரையும் துன்பத்துக்குள்ளாக்குவதும் நம் அறிவுக்கு அழகல்லவே. உலகைக் காக்க நம்மாலியன்றதைச் செய்தோமெனில் நமது தேவைகள் தானாகவே பூர்த்தியாகும் எனும் உண்மையை அனைவரும் உணர்ந்து சுயநலம் விடுத்து எல்லோரும் ஒன்றுபட்டு உலக நலக் கருதி உழைத்து உயர்வதே ஆறறிவு படைத்த மனிதகுலத்துக்குப் பெருமை சேர்க்கும்.

பகுத்துண்டு பல்லுயி ரோம்புதல் ஆன்றோர்

தொகுத்தவற்றுள் எல்லாம் தலை.

எத்தனை எத்தனை இன்பமடா

திரைப்படம்: ஆசை முகம்

இயற்றியவர்: கவிஞர் வாலி

இசை: எஸ்.எம். சுப்பையா நாயுடு

பாடியவர்: பி.பி. ஸ்ரீநிவாஸ்

எத்தனை எத்தனை இன்பமடா இவை

எல்லாம் உனக்கே சொந்தமடா

எத்தனை எத்தனை இன்பமடா இவை

எல்லாம் உனக்கே சொந்தமடா

மரம் படைத்தான் ஒரு கொடி படைத்தான் அந்த

மரத்தைத் தழுவி அதைப் படர வைத்தான் படர வைத்தான்

மரம் படைத்தான் ஒரு கொடி படைத்தான் அந்த

மரத்தைத் தழுவி அதைப் படர வைத்தான்

மலர் படைத்தான் நறுமணங் கொடுத்தான் அதில்

வடியும் தேனையும் உனக்களித்தான்

மலர் படைத்தான் நறுமணங் கொடுத்தான் அதில்

வடியும் தேனையும் உனக்களித்தான்

எத்தனை எத்தனை இன்பமடா இவை

எல்லாம் உனக்கே சொந்தமடா

உன்னைப் படைத்தான் ஒரு பெண்ணைப் படைத்தான் காதல்

உறவு கொள்ளவும் வழிவகுத்தான் வழிவகுத்தான்

உன்னைப் படைத்தான் ஒரு பெண்ணைப் படைத்தான் காதல்

உறவு கொள்ளவும் வழிவகுத்தான்

பொன்னைப் படைத்தான் பல பொருள் படைத்தான் இந்த

பூமியில் சொர்க்கம் காண வைத்தான்

பொன்னைப் படைத்தான் பல பொருள் படைத்தான் இந்த

பூமியில் சொர்க்கம் காண வைத்தான்

எத்தனை எத்தனை இன்பமடா இவை

எல்லாம் உனக்கே சொந்தமடா

கண் கொடுத்தான் நீ காண்பதற்கு பல

காட்சி தந்தான் கண்டு களிப்பதற்கு களிப்பதற்கு

கண் கொடுத்தான் நீ காண்பதற்கு பல

காட்சி தந்தான் கண்டு களிப்பதற்கு

மனங் கொடுத்தான் ஒன்றை நினைப்பதற்கு நல்ல

மதி கொடுத்தான் எண்ணிப் பார்ப்பதற்கு

மனங் கொடுத்தான் ஒன்றை நினைப்பதற்கு நல்ல

மதி கொடுத்தான் எண்ணிப் பார்ப்பதற்கு

எத்தனை எத்தனை இன்பமடா இவை

எல்லாம் உனக்கே சொந்தமடா

ஆஹஹஹாஹஹா ஆஹஹஹா ஓஹோ 

ஹோஹொஹோஹொஹோ ம்ஹ்ம்ஹ்ம்ஹ்ம்

அன்பினாலே உண்டாகும் இன்பநிலை

இவ்வுலக வாழ்வு அநித்தியமானது, வாழ்வில் நாம் ஈட்டுபவை, இழப்பவை யாவும் அநித்தியமானவை, இன்று போனால் நாளை வரலாம், இன்று வந்திடில் நாளை மறையலாம், ஆனால் அன்பும் பாசமும் நித்தியமானவை, என்றும் நிலைத்திருப்பவை, நம் வாழ்வை இன்பமயமாக்குபவை. இவ்வுலகில் யாரும் தனக்கென மட்டுமே வாழ்தல் சாத்தியமில்லை. பஞ்சமா பாதகங்கள் புரிந்து பலரையும் வருத்தி வாழும் கொடியோரும் தமக்கென யாரேனும் சிலரிடமாவது அன்பும் பாசமும் கொண்டிருப்பர் என்பது நிதர்சனமான உண்மை, ஆயினும் பலருக்கு அநீதியிழைத்து சிலரிடம் அன்பு செலுத்துவோர் காணும் இன்பம் முழுமையானதாக இருக்காது. அவர்களுக்கு என்றென்றும் ஏதேனும் மனக்குறைகள் இருந்துகொண்டே இருக்கும். எதைக் கொண்டும் திருப்தியடையாமல் எந்நாளும் கவலையிலே மூழ்கியிருப்பார்கள் இத்தகைய குறைகுணத்தோர். 

வாழ்வை முழுமையாக அனுபவிக்கத் தெரிந்தவர்களே முக்தியடையும் தகுதியைப் பெறுகின்றனர். முக்தி என்பது எந்நிலையிலும் ஆத்ம திருப்தியோடு அமைதியாகத் திகழும் நிலை. முக்தி பெற ஒவ்வொருவரும் தொடர்ந்து முயற்சி செய்தாலே முடியும். கண்களை மூடிக்கொண்டு சில மணித்துளிகள் தியானம் செய்வதால் மட்டுமே முக்தியை அடைந்துவிட முடியாது. வாழ்நாள் உள்ளளவும் ஒவ்வொரு நொடியுலும் நாம் எண்ணும் எண்ணங்கள், செய்யும் செயல்கள், பேசும் பேச்சுக்கள், அறியும் விஷயங்கள் அனைத்தும் எவ்விதத்திலும் நம் மனதையோ பிறர் மனங்களையோ புண்படுத்தா வண்ணம் அமைந்திருப்பது அவசியம். அப்பொழுது அமைதி நிலைபெறும். அறிந்தோ அறியாமலோ நாம் பிறரது மனதைப் புண்படுத்த நேருமாயின் கூடிய விரைவில் நம் தவறுக்கு வருந்தி மன்னிப்புக் கோருவதே உயர்ந்த பண்பாகும். 

பெரும் செல்வந்தரான ஒரு நிலச்சுவான்தார் தன் நிலத்தில் நெடுங்காலமாக நல்ல விளைச்சல் இல்லாமல் அவதிப்படுகையில் அவரது ஜோதிடர் கூறிய அறிவுரைப்படி திருவிடைமருதூர் சிவன் கோவிலில் ஒருயாகம் செய்தார் ஆனால் ஆணவத்தினால் அவர் அந்த யாகத்தில் கலந்து கொண்ட முதியவர் ஒருவரது மனதைப் புண்படுத்தி விட்டார். ஆயினும் தான் செய்தது தவறு என்று அவர் அறியவில்லை. யாகம் முடிந்த பின்னர் அவர் பிரசாதத்தினை எடுத்துக்கொண்டு காஞ்சி பரமாச்சார்யாரிடம் சென்றார். பரமாச்சார்யார் அவர் செய்த பாபத்தைச் சுட்டிக்காட்டிப் பரிகாரம் தேடும் படி அறிவுறுத்தவே தான் செய்த தவற்றை உணர்ந்த அவர் தன்னால் அவமானப் பட்ட பெரியவரிடம் மன்னிப்பு வேண்டிப் பெறும் நோக்கத்துடன் அப்பெரியவர் இருக்கும் ஊருக்குச் சென்ற சமயம் அப்பெரியவர் இவ்வுலகை விட்டே சென்ற நிலையில் ஈமச் சடங்குகள் நடைபெறுவதைக் கண்டு மனம் புழுங்கினார். அதன் பின்னர் தான் ஈட்டிய பொருளனைத்தையும் தான தருமங்கள் செய்து வாழ்ந்தார். இருப்பினும் அவரது மனக்கவலை என்றும் நீங்கவேயில்லை.

http://www.educationalservice.net/2012/january/20120148_veda-truth.php

பிற உயிர்களிடம் அன்பு செலுத்துவோம், குடும்பத்தாரை அரவணைத்துச் செல்வோம், உற்றார் உறவினருடன் ஒன்றுபட்டு வாழ்வோம், நண்பர்களுடன் இயன்ற பொழுதெல்லாம் கலந்து மகிழ்வோம். துன்பப்படுவோர்க்கு நம்மால் இயன்ற உதவிகளை செய்வோம். அகந்தையை அகற்றி அன்பும் பாசமும் மேலோங்க இன்புற்று வாழ்ந்து தன்னிறைவு பெறுவோம்.

உலகமெலாம் பருவமழை ஒத்தபடி பெய்யட்டும்!
உழவரெலாம் தானியத்தை உவப்புடனே பெருக்கட்டும்!
பல தொழில்கள் புரிகின்ற பாட்டாளி உயரட்டும்!
பகுத்துணர்வில் தொகுத்துணர்வு பண்பாட்டைப் பெருக்கட்டும்!கலகங்கள் போட்டிபகை கடந்தாட்சி நடக்கட்டும்!
கல்லாமை,கடன்,வறுமை களங்கங்கள் மறையட்டும்!
நல வாழ்வை அளிக்கும் மெய்ஞ்ஞான ஒளி வீசட்டும்!
நம் கடமை அற வாழ்வின் நாட்டத்தே சிறக்கட்டும்!’’
வாழ்க வையகம்! வாழ்க வளமுடன்!

அன்பினாலே உண்டாகும் இன்பநிலை

திரைப்படம்: பாசவலை

இயற்றியவர்: ஏ. மருதகாசி

இசை: எம்.எஸ். விஸ்வநாதன், டி.கே. ராம மூர்த்தி

பாடியவர்: சி.எஸ். ஜெயராமன்

ஆண்டு: 1956

அன்பினாலே உண்டாகும் இன்பநிலை அதை

அணைந்திடாத தீபமாக்கும் பாசவலை

அன்பினாலே உண்டாகும் இன்பநிலை

அன்பினாலே உண்டாகும் இன்பநிலை அதை

அணைந்திடாத தீபமாக்கும் பாசவலை

பாசவலை பாசவலை

அன்பினாலே உண்டாகும் இன்பநிலை

சொந்தமெனும் உறவுமுறை நூலினாலே

சொந்தமெனும் உறவுமுறை நூலினாலே - அருட்

ஜோதியான இறைவன் செய்த பின்னல் வேலை

பாசவலை பாசவலை - அருட்

ஜோதியான இறைவன் செய்த பின்னல் வேலை

பாசவலை பாசவலை

அன்பினாலே உண்டாகும் இன்பநிலை

கொஞ்சுமொழி குழந்தைச் செல்வம் நிறைந்ததாலே ஏ...

கொஞ்சுமொழி குழந்தைச் செல்வம் நிறைந்ததாலே நல்ல

குலவிளக்காய் மனைவி வந்து அமைந்ததாலே நல்ல

குலவிளக்காய் மனைவி வந்து அமைந்ததாலே

தம்பி தமையன் ஒன்று சேர்ந்து வாழ்வதாலே

தம்பி தமையன் ஒன்று சேர்ந்து வாழ்வதாலே

சம்சாரத்திலே எந்த நாளும் மனசு போலே

அன்பினாலே உண்டாகும் இன்பநிலை அதை

அணைந்திடாத தீபமாக்கும் பாசவலை

அன்பினாலே உண்டாகும் இன்பநிலை

சும்மாக் கெடந்த நெலத்தைக் கொத்தி

இந்தியா ஒரு விவசாய நாடு. இங்கே விளையும் தானியங்களுக்குப் பஞ்சமில்லை. இது கனியும் கிழங்கும் தானியங்களும் கணக்கின்றித் தரும் நாடு என்று அமரகவி பாரதியால் புகழப்பெற்றது. இருப்பினும் இந்நாட்டில் ஊருக்கெல்லாம் உணவளிக்கும் விவசாயிகள் அநேகமாக அனைத்து மாநிலங்களிலும் கடன் தொல்லையால் பாதிக்கப்பட்டுத் தற்கொலை செய்துகொள்ளும் நிலைக்குத் தள்ளப்படுகின்றனர். விவசாயிகள் தற்கொலை வெகு காலமாகவே ஒரு தொடர்கதையாக நிகழ்ந்து வந்த போதிலும் அது பற்றி ஆட்சியாளர்கள் எவரும் எவ்வித அக்கரையும் கொள்வதில்லை. விவசாயிகள் பெரும்பாலும் கடன் வாங்குவது செயற்கை இரசாயன உரத்துக்கும் பல்வேறு காரணங்களால் தங்களது நிலத்தில் விளையும் விளைபொருட்கள் பாழவதாலும் சரியான விலைக்கு விற்கப் படாமல் நஷ்டமடைவதாலும் உண்டாகும் இக்கட்டான சூழ்நிலையை சமாளிப்பதற்குமே ஆகும்.

இயற்கையோடு இயைந்த வாழ்வு வாழ்ந்து வந்த இந்திய மக்கள் அந்நியர் ஆதிக்கத்தால் மதிமயங்கி செயற்கை வழிமுறைகளைப் பின்பற்றியதன் விளைவால் இன்று பல விளைநிலங்கள் செயற்கை உரங்களாலும், விஷத் தன்மை கொண்ட பூச்சிக்கொல்லி மருந்துகளாலும் பாழ்பட்டு மலட்டுத் தன்மையை எய்தியுள்ளன. அவற்றில் பயிர்கள் செழித்து வளர ஏற்ற சூழ்நிலையில்லாமல் போவதால் பலர் தம் விளைநிலங்களை வந்த விலைக்கு விற்றுவிட்டு, கிராமங்களை விட்டு நகரங்களை நாடிச் சென்று அங்கே அரை வயிற்றுக் கஞ்சிக்காகக் கூலி வேலை செய்து நடைபாதையோரங்களில் படுத்துறங்கிப் பரிதாப வாழ்வை மேற்கொள்ளும் சூழ்நிலை நம் நாட்டில் உருவாகியுள்ளது. அது மட்டுமின்றி நாம் உண்ணும் உணவு மட்டுமின்றி நிலத்தடி நீரும் பாழ்பட்டு விஷமாகின்றது, சுற்றுச் சூழல் மாசுபடுகின்றது, உலகம் வெப்பமயமாகி உலகமே அழிவுப்பாதையில் இட்டுச்செல்லப்படுகின்றது.

விவசாயிகளின் வாழ்க்கையில் முன்னேற்றம் காணவும் உலகைக் காக்கவும், இயற்கை வழி விவசாயத்தைக் கடைபிடிக்க வேண்டியதன் அவசியத்தை வலியுறுத்துவதுடன் விவசாயிகளை முறையாக வழிநடத்கிறார் இயற்கை விஞ்ஞானி கோ. நம்மாழ்வார்.

http://www.mazhalaigal.com/entertainment/video/agriculture/agriculturist/2009102402_mega-tv-meeting.php

தஞ்சை மாவட்டம் திருக்காட்டுப் பள்ளியைச் சேர்ந்த நம்மாழ்வார் தமிழ்நாட்டின் முதன்மை இயற்கை அறிவியலாளர்களில் ஒருவர். இவர் அண்ணாமலைப் பல்கலைக்கழகத்தில் வேளாண்மை இளங்கலைப் படிப்பைக் கற்றவர். கோவில்பட்டி மண்டல மழைப்பயிர் ஆய்வகத்தில் 1960ஆம் ஆண்டு ஆய்வு உதவியாளராகப் பணியில் சேர்ந்து ஆய்வகங்களில் நிலவும் களப்பணியில் ஈடுபடாது செய்யப்படும் பயனில்லாப் பணிகளுக்கு எதிராக்க குரல் கொடுத்து மூன்றாண்டுகளில் வெளியேறினார். பசுமைப் புரட்சி, நிலச்சீர்திருத்தம், தொழில்மயமாக்கம், சூழல் பாதுகாப்பு தொடர்பாக காரமான விமர்சனங்களையும் ஆக்கபூர்வமான மாற்றுக்களையும் முன்வைத்தவர். தமிழ்நாட்டில் இயற்கை வழி வேளாண்மை முறைகளை ஊக்குவித்து வருபவர். குடும்பம் அமைப்பு உட்பட 250க்கும் மேற்பட்ட அரசு சாரா அமைப்புகளின் அமைப்பாளரும் ஆவார்.
"தமிழின வாழ்வியல் பல்கலைக்கழகம்" என்ற அமைப்பினைத் தொடங்கி, தமிழ்நாட்டின் கிராமப்புறங்கள் எல்லாவற்றையும் கால்நடையாக எட்டி, அங்கு கருத்தரங்கங்களும், பயிற்சி வகுப்புகளும் நடத்தி வருபவர். "பேரிகை' என்றொரு இயற்கை உழவாண்மை வாழ்வியல் மாத இதழை வெளியிடுகிறார். தமிழ்நாடு மாசு கட்டுப்பாட்டு வாரியம், இவருக்குச் "சுற்றுச் சூழல் சுடரொளி' விருதினை வழங்கியது.

இவர் காட்டிய வழியில் இன்று லட்சக்கணக்கான விவசாயிகள் நடந்து மிக்க பயனடைந்து வருவதால் இன்று செயற்கை உரங்களும் பூச்சிக்கொல்லி மருந்துகளும் தவிர்க்கப்பட்டு இயற்கை விவசாயத்தை மேற்கொள்ளும் விவசாயிகளின் எண்ணிக்கை நாளுக்கு நாள் கூடி வருகிறது.

உழுதுண்டு வாழ்வாரே வாழ்வார் மற்றெல்லாம்
தொழுதுண்டு பின்செல் பவர்

என்ற குறளுக்கிணங்க உலக மக்கள் யாவரும் தொழுது வணங்கும் நிலையில் விவசாயிகளை என்று வைக்கிறோமோ அன்றே உலகம் உய்யும்.

சும்மாக் கெடந்த நெலத்தைக் கொத்தி

திரைப்படம்: நாடோடி மன்னன்
பாடியவர்:  டி.எம். சௌந்தரராஜன், பி. பானுமதி
இயற்றியவர்: சுரதா
இசை: எஸ்.எம். சுப்பையா நாயுடு
ஆண்டு: 1958

ஓ ஓஓஓ ஓஓஓ ஓஓஓஓஓஓஓ ஓஓஓஓஓ
ஓஓஓஓஓஓஓஓஓஓஓஓஒ ஓஓஓஓஓஓஓஓஓஓஓஓஓஓ
ஓஓஓஓஓஓஓஓஓஓஓஓஒ ஓஓஓஓஓஓஓ

சும்மாக் கெடந்த நெலத்தைக் கொத்தி
சோம்பலில்லாமே ஏர் நடத்தி
சும்மாக் கெடந்த நெலத்தைக் கொத்தி
சோம்பலில்லாமே ஏர் நடத்தி
கம்மாக் கரைய ஒசத்திக் கட்டிக்
கரும்புக் கொல்லையில் வாய்க்கா வெட்டி
சம்பாப் பயிரைப் பறிச்சு நட்டு
தகுந்த முறையில் தண்ணீர் விட்டு
நெல்லு வெளெஞ்சிருக்கு வரப்பும்
உள்ளே மறைஞ்சிருக்கு
நெல்லு வெளெஞ்சிருக்கு வரப்பும்
உள்ளே மறைஞ்சிருக்கு அட

காடு வெளஞ்சென்ன மச்சான் நமக்குக்
கையுங்காலுந்தானே மிச்சம் கையுங்காலுந்தானே மிச்சம்
காடு வெளஞ்சென்ன மச்சான் நமக்குக்
கையுங்காலுந்தானே மிச்சம் கையுங்காலுந்தானே மிச்சம் இப்போ
காடு வெளையட்டும் பொண்ணே நமக்குக்
காலமிருக்குது பின்னே காலமிருக்குது பின்னே
காடு வெளையட்டும் பொண்ணே நமக்குக்
காலமிருக்குது பின்னே காலமிருக்குது பின்னே

மண்ணைப் பிளந்து சுரங்கம் வெச்சு
பொன்னை எடுக்கக் கனிகள் வெட்டி
மண்ணைப் பிளந்து சுரங்கம் வெச்சு
பொன்னை எடுக்கக் கனிகள் வெட்டி
மதிலு வச்சு மாளிகை கட்டி
கடலில் மூழ்கி முத்தை எடுக்கும்
மதிலு வச்சு மாளிகை கட்டி
கடலில் மூழ்கி முத்தை எடுக்கும்
வழிகாட்டி மரமான தொழிலாளர் வாழ்க்கையிலே
பட்ட துயரினி மாறும் ரொம்பக்
கிட்ட நெருங்குது நேரம் கிட்ட நெருங்குது நேரம் அவர்
பட்ட துயரினி மாறும் ரொம்பக்
கிட்ட நெருங்குது நேரம் கிட்ட நெருங்குது நேரம் அட

காடு வெளஞ்சென்ன மச்சான் நமக்குக்
கையுங்காலுந்தானே மிச்சம் கையுங்காலுந்தானே மிச்சம்
காடு வெளையட்டும் பொண்ணே நமக்குக்
காலமிருக்குது பின்னே காலமிருக்குது பின்னே

மாடா உழைச்சவன் வாழ்க்கையிலே பசி
வந்திடக் காரணம் என்ன மச்சான்? அவன்
தேடிய செல்வங்கள் வேறு இடத்திலே
சேர்வதினால் வரும் தொல்லையடி
பஞ்சப் பரம்பரை வாழ்வதற்கே இனிப்
பண்ண வேண்டியது என்ன மச்சான்? தினம்
கஞ்சி கஞ்சி என்றால் பானை நெறையாது
சிந்திச்சு முன்னேற வேண்டுமடி
வாடிக்கையாய் வரும் துன்பங்களை இன்னும்
நீடிக்கச் செய்வது மோசமன்றோ? - இருள்
மூடிக்கிடந்த மனமும் வெளுத்தது
சேரிக்கும் இன்பம் திரும்புமடி இனி
சேரிக்கும் இன்பம் திரும்புமடி
நல்லவர் ஒன்றாய் நைந்து விட்டால் மீதம்
உள்ளவரின்ர்கள் நிலை என்ன மச்சான்?
நாளை வருவதை எண்ணி எண்ணி அவர்
நாழிக்கு நாழி தெளிவாரடி அட

காடு வெளஞ்சென்ன மச்சான் நமக்குக்
கையுங்காலுந்தானே மிச்சம் கையுங்காலுந்தானே மிச்சம்
நானே போடப் போறேன் சட்டம் பொதுவில்
நன்மை புரிந்திடும் திட்டம் நாடு நலம் பெறும் திட்டம்
நன்மை புரிந்திடும் திட்டம் நாடு நலம் பெறும் திட்டம்
நன்மை புரிந்திடும் திட்டம் நாடு நலம் பெறும் திட்டம்

மதுரை அரசாளும் மீனாட்சி

மாதா, பிதா, குரு, தெய்வம் என்று நம் ஒவ்வொருவரையும் காக்கும் சக்திகளை வரிசைப் படுத்தியுள்ளனர் நம் முன்னோர்கள். தாயிற் சிறந்த கோவிலுமில்லை, தந்தை சொல் மிக்க மந்திரமில்லை, குருவே துணை என்று இவற்றுள் முதல் மூவரைப் பற்றியும் சிறப்பித்த பின்னரே தெய்வத்தைக் குறித்துப் பல துதிகள் வழங்கப் பட்டன. இவற்றில் அன்னையின் அன்பிற்கு ஈடாக ஏதும் இல்லை என்பதனாலேயே பால் நினைந்தூட்டும் தாயினும் சாலப் பரிந்து இறைவன் அருள்வதாக இறைவனின் அடியார்கள் இறைவனைத் தாய்க்கு நிகராகக் கொண்டு வழிபட்டனர். அவ்வாறு தாயின் வடிவில் அருள் புரிபவள் அன்னை பராசக்தி. அவள் காஞ்சிமாநகரில் காமாட்சியாகவும், மதுரையம்பதியில் மீனாட்சியாகவும், காசியில் விசாலாட்சியாகவும் அருள் பாலிக்கிறாள்.

காஞ்சி காமாட்சி ஆலயம் காஞ்சி ஸ்ரீ மடாதிபதிகளால் நிர்வகிக்கப் படுகிறது. இவ்வாலயத்தில் அன்னை மீனாட்சியின் அருள் அனைவருக்கும் சமமாகக் கிடைக்கும் வகையில் கட்டணம் ஏதும் வசூலிப்பதில்லை. காஞ்சி காமகோடி பீடாதிபதி காமாட்சியின் ஆலயத்துக்குப் பொன்கூரை வேய்ந்து சிறப்பித்துள்ளார். ஸ்ரீ மடத்தின் மூலம் எண்ணற்ற தரும கைங்கர்யங்கள் நிறைவேற்றப் படுகின்றன.

ஆண்டவன் சன்னதியில் அனைவரும் சமம் என்பது உண்மையின் தத்துவம். முற்காலத்தில் நம் நாட்டை ஆண்ட மன்னர்கள் மக்கள் யாவரையும் சமமாக மதித்துப் போற்றினர் எனும் உண்மையை உலகத்தார்க்கு உணர்த்துபவை அம்மன்னர்கள் அரும்பாடுபட்டுக் கட்டிய அற்புதமான ஆலயங்கள். ஆனால் இன்றோ கருப்புப் பண பலத்தாலும் ஆள் பலத்தாலும் ஆட்சிக்கு வந்து நாட்டை ஆட்டிப் படைக்கும் சுயநலவாதிகள் மக்களைப் பல்வேறு வழிகளிலும் கசக்கிப் பிழிந்து அவர்கள் தங்கள் உயிர் வாழ்வுக்காகப் பாடுபட்டு ஈட்டும் பணத்தைப் பகல் கொள்ளையடிக்கவென்று வகுத்த திட்டங்களுள் ஒன்றே ஆலய தரிசன டிக்கட்.

மதுரை மீனாட்சியம்மன் ஆலயத்தை நான் முதலில் தரிசித்தது என் தாய், தந்தை, சகோதரன், சகோதரி ஆகியோருடன் 1964ஆம் ஆண்டாகும். அதன் பின்னர் 1980ஆம் ஆண்டு ஒரு முறை என் தந்தையுடன் சென்று தரிசித்தேன். அப்பொழுது அங்கு திருமுருக கிருபானந்த வாரியார் சொற்பொழிவு நிகழ்ந்தது. சொற்பொழிவை என் தந்தையுடன் அமர்ந்து கேட்டேன். சொற்பொழிவு முடிந்ததும் திருமுருக கிருபானந்தவாரியார் அவர்கள் தன்னிடம் வரிசையில் வந்து நின்ற அன்பர்கள் அனைவருக்கும் தனது திருக்கரத்தால் திருநீறு அணிவித்து ஆசி வழங்கினார். வரிசையில் நானும் நின்று அவர் கையால் திருநீறு அணியப் பெற்றேன். அதன் பின்னர் என் மனைவியுடன் 1984ஆம் ஆண்டு மீனாட்சியம்மனை தரிசித்தேன். அப்பொழுதெல்லாம் பொதுமக்கள் அனைவரும் எவ்விதக் கட்டுப்பாடுமின்றி ஆலயத்தினுள் சென்று பார்வையிடவும் வழிபடவும் முடிந்தது. ஆனால் தற்போது 2012 ஜனவரி முதல் தேதியன்று என் கல்லூரித் தொழர்களுடன் அமைந்த மதுரை சந்திப்பின் போது நண்பர்கள் அனைவருடனும் சேர்ந்து தரிசிக்கச் செல்கையில் முன்பிருந்த உற்சாகம் இல்லை, காரணம் தர்ம தரிசனம், சிறப்பு தரிசனம் என பக்தர்களைப் பிரித்து தரிசன டிக்கட் மூலம் வசூல் வேட்டை நடத்த ஆலயமெங்கும் அமைக்கப் பட்ட தடைகள். 1995ஆம் வருடம் முதலே இந்த அவலம் நிறைவேறி வருகிறது என அவ்வமயம் அங்கே வந்திருந்த மூத்த அன்பர் ஒருவர் மூலம் அறிந்தேன்.

கடவுளைக் காட்சிப் பொருளாக்கிக் காசு பண்ணும் சிறுமை கண்டு மனம் கொதிக்கிறதேயன்றி ஆலயத்தில் இறைவழிபாட்டில் ஈடுபாடு வரவில்லை. ஆலயம் தொல்பொருட்காட்சியகமாக மாறியுள்ளதை உணர்ந்து அதிர்ச்சியுற்றேன். ஆலய்த்தின் உள்ளே பல கடைகள் அலங்காரப் பொருட்களும் கடவுளர் படங்களும் பிற பொருட்கள் பலவும் விற்பனை செய்யும் வகையில் அமைக்கப்பட்டுள்ளன. அன்னை மீனாட்சியின் கைகள், கால்கள் மட்டுமன்றிக் கண்களையும் கட்டிப் போட்டது போன்றதோர் உணர்வே மேலோங்கியது.

நாட்டு மக்களைக் காப்பது அரசின் கடமை. அக்கடமையை அரசு முறையாக ஆற்றாமல் பல்வேறு வகையிலும் மக்கள் துன்புறுவதை அனுமதித்துள்ள நிலையில் மன நிம்மதி நாடி ஆலயங்களுக்குச் சென்று ஆண்டவனிடம் தங்கள் மனக்குறையை முறையிடச் செல்ல வேண்டுமாயின் அதற்கும் காசு கொடுத்தாலே இயலும் எனும் இக்கட்டான சூழ்நிலை நாட்டுக்குக் கேடு விளைவிப்பதாகும். இந்நிலைமை மாற வேண்டும். இறைவன் அருள் அனைவர்க்கும் எளிதில் கிட்ட வேண்டும். இறையருள் வியாபாரப் பொருளாக்கப் பட்டது மனித வர்க்கத்தின் சுயநல வெறியாட்டத்தின் உச்சகட்டமாகும். இத்தகைய வெறியாட்டம் அழிவுக்கே வழி வகுக்கும்.

இதனால் எழும் பெரிய சந்தேகம்: மதுரை மீனாட்சி ஆள்கிறாளா அல்லது அடிமையாக ஆளப்படுகிறாளா?

மதுரை அரசாளும் மீனாட்சி

திரைப்படம்: திருமலை தென்குமரி
இயற்றியவர்: உளுந்தூர்ப் பேட்டை சண்முகம்
இசை: குன்னக்குடி வைத்தியநாதன்
பாடியவர்: சீர்காழி கோவிந்தராஜன்

ஓம்
சஹனா பவது;சகனௌ புனக்து
சக வீர்யம் கரவாவகை
தேஜஸ் விநாவதி தமஸ்து
மா வித் விஷாவகை
ஓம் சாந்தி சாந்தி சாந்தி

மதுரை அரசாளும் மீனாட்சி
மாநகர் காஞ்சியிலே காமாட்சி
மதுரை அரசாளும் மீனாட்சி
மாநகர் காஞ்சியிலே காமாட்சி
மதுரை அரசாளும் மீனாட்சி

தில்லையில் அவள் பெயர் சிவகாமி
திருக்கடவூரினிலே அபிராமி
தில்லையில் அவள் பெயர் சிவகாமி
திருக்கடவூரினிலே அபிராமி
நெல்லையில் அருள்தருவாள் காந்திமதி
நெல்லையில் அருள்தருவாள் காந்திமதி
அன்னை அவளல்லால் ஏது கதி?

மதுரை அரசாளும் மீனாட்சி
மாநகர் காஞ்சியிலே காமாட்சி
மதுரை அரசாளும் மீனாட்சி

திரிபுர சுந்தரி சீர்காழியிலே சீர்காழியிலே
ஆஆஆஆஆஆஆ ஆஆஆஆஆ....
திரிபுர சுந்தரி சீர்காழியிலே
சிவசக்தி பார்வதி கயிலையிலே
திரிபுர சுந்தரி சீர்காழியிலே
சிவசக்தி பார்வதி கயிலையிலே
வரம் தரும் கற்பகமாம் மயிலையிலே
வரம் தரும் கற்பகமாம் மயிலையிலே
வஞ்சமில்லா நெஞ்சில் வாழ்பவளே

மதுரை அரசாளும் மீனாட்சி
மாநகர் காஞ்சியிலே காமாட்சி
மதுரை அரசாளும் மீனாட்சி

திருவேற்காட்டினிலே கருமாரி
தென்புதுவை நகரினிலே முத்துமாரி
திருவேற்காட்டினிலே கருமாரி
தென்புதுவை நகரினிலே முத்துமாரி
சமயபுரம் தன்னில் மகமாயி
சமயபுரம் தன்னில் மகமாயி
சௌபாக்யம் தந்திடுவாள் மாகாளி சகல
சௌபாக்யம் தந்திடுவாள் மாகாளி